پر غزې د اسراییل په هوايي بریدونو کې ۷ فلسطینیان وژل شوي
د غزې روغتیايي چارواکي وايي، د چارشنبې په ورځ د اسراییل په هوايي بریدونو او ډزو کې د دوو ماشومانو په ګډون اووه فلسطینیان وژل شوي دي. خو د اسراییل پوځ ویلي، په غزه کې یې وسلهوال په نښه کړي دي.
د غزې روغتیايي چارواکو رویټرز اژانس ته ویلي، چې د غزې یوه ښوونځي ته نږدې د اسراییل په هوايي برید کې یو کس وژل شوی او په دوو جلا پېښو کې ۱۲ نور کسان ټپیان شوي دي.
په ورته مهال د اسراییل پوځ ویلي، په غزه کې یې وسله وال په نښه کړي، خو د مرګ ژوبلې په اړه یې معلومات نه دې ورکړي
همدارنګه د غزې په سوېل د خان یونس د المواصي په سیمه کې د بېځایه شویو خلکو پر یوه خېمه د اسراییل په هوايي برید کې لږ تر لږه څلور کسان چې یو پکې ۱۰ کلن ماشوم و، وژل شوي دي.
روغتیايي کارکوونکو همدارنګه ویلي، د غزې ښار لوېدیځ ته پر یوه موټر په برید کې یو بل کس هم وژل شوی، چې ورسره د ورځې د وژل شویو شمېر لږ تر لږه اوو تنو ته رسېدلی دی.
د اسراییل پوځ د دغو وروستیو پېښو په اړه سملاسي څه نه دي ویلي.
