د خیبر پښتونخوا په بنو کې د بېپیلوټه الوتکې برید یو کس وژلی او څلور نور یې ټپیان کړي دي
د خیبر پښتونخوا د بنو ولسوالۍ د بکاخېل ګمرک په سیمه کې د بېپیلوټه الوتکې په برید کې یو کس وژل شوی او څلور نور ټپیان دي. د بنو د پولیسو مشر رب نواز خان ویلي، وسلهوالو له کوادکاپټر څخه چاودېدونکي توکي غورځولي چې له امله یې دغه کسانو ته مرګژوبله اوښتې ده.
ځایي چارواکو ویلي، ټپیان د بنو ولسوالۍ مرکزي روغتون ته لېږدول شوي او تر درملنې لاندې دي. د پولیسو په وینا؛ تر دې وړاندې د امنیتي ځواکونو پر ضد د بېپیلوټه الوتکو ګڼ بریدونه شنډ شوي، خو وسلهوالو اوس پر ملکي وګړو بریدونه پیل کړي دي.
امنیتي ځواکونو سیمه کلابنده کړې او د بریدګرو د نیولو لپاره یې د پلټنې عملیات هم پیل کړي دي.
