د پښتونخوا نېشنل عوامي ګوند مشر خوشحال خان کاکړ د کوټې د هنه اوړک د برید پرضد احتجاجي پرلت ته په وینا کې د پاکستان پر امنیتي ادارو سختې نیوکې وکړې او ویې ویل، که حکومت ادعا کوي چې وسلهوال له افغانستان نه راځي؛ نو له ډیورنډ کرښې ۱۵۰ کیلومتره لرې هنه اوړک او زیارت ته څنګه رسېږي.
هغه وایي، ډیورنډ کرښه خو له هنه اوړک او زیارت څخه شاوخوا ۱۵۰ کیلومتره لرې ده؛ بیا په سلګونه وسلهوال له پرمختللو وسلو سره دغه سیمو ته څنګه رسېږي؟ خوشحال خان کاکړ وویل، وسلهوال یوازې په پټه نه، بلکې په ښکاره د زرغون غر، هنه اوړک، منګله، هرنايي، زیارت، عبدالله کلا، سیفالله کلا او دوکۍ په سیمو کې ګرځي او خلک یې هره ورځ ویني.
هغه زیاته کړه: «زه چې شل کیلومتره سفر کوم، څلور ځله په امنیتي پوستو کې خپل شناختي کارت ښیم او ځان معرفي کوم؛ خو کله چې له ترهګرو سره ساعتونه جګړه روانه وي، امنیتي ځواکونه نه راځي؛ دا څنګه ریاست دی؟»
د نوموړي په وینا؛ که عادي خلک په هره امنیتي پوسته کې پلټل کېږي؛ نو باید دا هم روښانه شي چې وسلهوال له دغه ټولو پوستو سره، سره څنګه د درنو وسلو پر مټ ازاد تګراتګ کوي.
بل لور ته د جمعیت علمای اسلام د کوټې څانګې مشر مولانا عبدالرحمان رفیق هم پرلت ته په وینا کې وویل، له همدې ځایه په افغانستان کې د پاکستان امنیتي ادارې وسلهوال ویني؛ خو د خپلو پوځي مرکزونو او چاوڼیو ترڅنګ ورته وسلهوال نه ښکاري.
مولانا عبدالرحمان رفیق وویل: «یا خو ریاست ولس ته امنیت نهشي ورکولای، یا هم په دې ناامنۍ کې ورسره شریک دی». هغه زیاته کړه، چې امن د ولس بنسټیز حق دی او خلک ځکه مالیه ورکوي چې دولت یې د سر او مال ساتنه وکړي.
