د افغانستان په پلازمېنه کابل کې یو سلمان د امنیتي اندېښنو له امله د نوم نه ښودلو په شرط وایي، د طالبانو له بیا واکمنېدو وروسته د سلمانۍ کاروبار او د خلکو د خوښې د وېښتانو ډولونه له سختو محدودیتونو سره مخ شوي دي.
نوموړي ویلي، له پخوا به یې د بېلابېلو وېښتانو د ډولونو انځورونه له ځان سره ساتل او د پېرودونکو د خوښې مطابق به یې وېښتان ورسمول؛ خو اوس د دغه انځورونو نندارې ته اېښودل هم منع شوي دي.
هغه وايي، مخته به یې هټۍ شپه او ورځ له خلکو ډکه وه؛ خو اوس تر غرمې وروسته هټۍ پرانیزي او د مازدیګر لهخوا بېرته کور ته ستنېږي، ځکه د پخوا په څېر کار نهشته.
د راپور له مخې؛ د طالبانو له واکمنېدو وروسته په ځانګړي ډول د ۲۰۲۱کال له سپټمبر راهیسې د نارینهو د ږېرو خرییل او د ځینو عصري وېښتانو سټایلونه منع اعلان شول او د امر بالمعروف او نهې عن المنکر محتسبینو پر سلمانيو منظم څار پیل کړ.
دغه سلمان وايي، محتسبین به ساعتونه په دوکان کې ناست وو او ورته به یې ویل چې کوم ډول وېښتان او ږېرې باید جوړې نهکړي. د هغه په خبره؛ ډېری سلمانیان جریمه شوي، ځینې نیول شوي او ځینې اړ شوي چې خپلې هټۍ وتړي.
هغه زیاتوي، چې اوس ځوانان هم د وېښتانو د ځانګړو سټایلونو غوښتنه نهکوي؛ ځکه وېره لري چې له ستونزو سره به مخ شي. د نوموړي په وینا؛ یو ځل یې د یوه تنکي ځوان وېښتان د هغه د خوښې مطابق جوړول، چې د طالبانو یو محتسب هټۍ ته ورغی شخړه یې ورسره وکړه، ګواښ یې وکړ چې هټۍ به یې وتړي او په پای کې یې جریمه کړ.
دغه سلمان چې د څلورو ماشومانو پلار دی وایي، دغه هټۍ د هغه د کورنۍ د عاید یوازینۍ سرچینه ده؛ خو اوس یې عاید د پخوا پرتله نږدې نیمايي ته راکم شوی دی. په راپور کې راغلي، چې د طالبانو له واکمنېدو مخکې سلمانۍ یوازې د وېښتانو جوړولو ځایونه نهوو؛ بلکې د خلکو د ناستې، چای څښلو او ټولنیزو خبرو اترو مرکزونه هم وو؛ خو اوس دغه فضا لهمنځه تللې ده.
د راپور له مخې؛ سره له ټولو محدودیتونو یوشمېر افغان سلمانیان لاهم هڅه کوي خپل کار ته دوام ورکړي او هیله لري، چې یوه ورځ به بېرته هغه وخت راشي چې خلک به د خپلې خوښې له مخې خپل ژوند او بڼه ټاکلی شي.
