د ملګرو ملتونو کارپوهان: د ماهرنګ بلوڅ لپاره د عمري بند سزا د عدالت ضد کړنه ده

کارپوهانو ویلي، پر ماهرنګ بلوڅ د سوله‌ییزو اعتراضونو، د بیان او ټولنې ازادۍ د ځپلو لپاره د «ترهګرۍ او قتل» تورونه لګول شوي او پرې ناعادلانه محاکمه شوې ده.
د چنګاښ په لومړۍ نېټه د بلوچستان د ترهګرۍ ضد محکمې ماهرنګ بلوڅ ته د «اېف‌سي» یوه سرتېري د وژنې اړوند قضیه کې د عمري بند سزا واوروله. د محکمې د پرېکړې له مخې؛ د ګوادر غونډې پرمهال د ډبرو وېشتلو پېښه کې یاد سرتېری لومړی ټپي او وروسته یې د سختو ټپونو له امله ساه ورکړه.
د نوموړې ترڅنګ د یادې محکمې د بلوڅانو د یووالي غورځنګ یو بل مخکښ غړي صبغت الله ته هم په یوې قضیې کې د عمري بند سزا اورول شوې ده. د ملګرو ملتونو کارپوهانو ویلي، چې د محکمې پرېکړه یوازې د دوی د اعتراض په ګډون ولاړه وه او دا یې د ترهګرۍ عمل بللی؛ حال دا چې د عادلانه محاکمې اصول نه‌دي رعایت شوي.
دوی زیاته کړې، د ماهرنګ بلوڅ پر ضد لسګونه نورې دوسیې هم روانې دي او شاوخوا ۵۰ نورې قضیې هم د هغې پر ضد ثبت شوې دي چې موخه یې د هغې او نورو بلوڅ فعالانو وېرول او چوپ کول دي.
کارپوهانو د هغې د روغتیايي وضعیت او د زندان د شرایطو په اړه هم اندېښنه ښودلې او ویلي یې دي، چې نوموړې کافي روغتیایي خدمتونو ته لاسرسی نه‌لري او د کورنۍ پر غړو یې هم فشار راوړل شوی دی.
دوی له پاکستان نه غوښتي، چې د مدني او سیاسي حقونو د نړۍوال میثاق او اساسي قانون له مخې د عادلانه محاکمې حق ته درناوی وکړي او د ترهګرۍ ضد قوانینو له ناوړه کارونې ډډه وکړي.
د ملګرو ملتونو کارپوهانو خبرداری ورکړی، چې د ماهرنګ بلوڅ محکومیت به په بلوچستان کې مدني فضا نوره هم محدوده کړي او د بشري حقونو د مدافعینو، په ځانګړي ډول د ښځینه فعالانو پر وړاندې به د ګواښونو کچه لوړه کړي.
دوی همداراز ویلي، په بلوچستان کې د سوداګریزو او کان‌کېندنې پروژو پرمهال باید د سیمه‌ییزو خلکو او اصلي اوسېدونکو حقونه خوندي شي او خلکو ته باید اجازه ورکړل شي چې خپلې اندېښنې په ازاد ډول څرګندې کړي.