یوشمېر افغان پناهغوښتونکو افغانستان انټرنشنل ته په لېږلي پيغام کې ویلي، دوی د برېتانیا د «ARAP» پروګرام له ډلې د پولیسو، ملي اردو، ملي امنیت او د نورو امنیتي ادارو پخواني سرتېري دي چې د ډېرو کلونو لپاره یې له برتانوي ځواکونو سره په ګډو عملیاتو کې برخه اخیستې وه.
دوی وایي، د دغه ماموریتونو ترسره کولو لپاره یې ژوند له ګواښ سره مخ کړی و: «موږ له برتانوي ځواکونو سره یوځای جګړه وکړه، په ګډو عملیاتو کې مو برخه واخیسته او خپل مسوولیتونه مو ادا کړل. نن د همدې ملګرتیا له امله موږ او زموږ کورنۍ له امنیتي ګواښونو سره مخ یو».
د دوی په وینا؛ له کلونو انتظار وروسته یې د پناهغوښتنې ګڼ غوښتنلیکونه د تکراري لاملونه په وړاندې کولو رد شوي دي. دوی زیاته کړې: «زموږ له ډلې ځینو د دغه پرېکړې لپاره تر درېیو کلونو ډېر انتظار وکړ او په پای کې یې ورته برېښنالیک ترلاسه کړ».
دغه پناهغوښتونکي وایي: «په ترلاسه شویو برېښنالیکونو کې یو ورته لامل دا و، چې موږ په مستقیم ډول د برېتانیا حکومت لهخوا ګومارل شوي نه وو؛ خو موږ افغان سرتېري وو، نه ملکي کارکوونکي یا شخصي قراردادیان چې د برېتانیا حکومت سره قراردادونه لري. زموږ همکاري د ګډو پوځي عملیاتو په چوکاټ کې وه او دا حقیقت د اسنادو او شواهدو سره ثابتېدای شي».
د یادو پناهغوښتونکو په وینا؛ د ګډو عملیاتو او خدمتونو اړوند ټول اسناد لري او چمتو دي، چې دغه اسناد له رسنیو، پارلماني غړو، د بشري حقونو ادارو او له هرې خپلواکې ادارې سره شریک کړي؛ څو د قضیو د بیاکتنې لړۍ په بېپرې توګه وارزول شي.
دوی وایي: «ژوند یې له ناروښانه وضعیت او وېرې سره مخ دی. هره ورځ د طالبانو لهخوا د نیولو، غچ اخیستنې او ځورونې له ګواښ سره مخ دي. موږ په عادلانه، شفافه او خپلواکه توګه د دغه قضیو د بیاکتنې غوښتنه کوو».
دوی له برېتانیا حکومت، رسنیو، د پارلمان غړو، د بشري حقونو سازمانونو او خلکو غوښتي، چې د دوی غږ واوري او په دې اړه اقدام وکړي؛ څو دغه قضیې په عادلانه توګه بیا له سره وارزول شي.
