د بلوچستان په مرکز کوټه کې د هنه اوړک او زیارت د وروستیو بریدونو په غبرګون په دوو بېلابېلو ځایونو کې احتجاجي پرلتونه دوام لري. د زیارت د مانګي ډیم له سیمې څخه د تښتول شویو ۲۱ پولیسو سرتېرو تر وژل کېدو وروسته، د هغوی مړي پرون د کوټې سول روغتون ته ولېږدول شول.
نن سهار د وژل شویو کسانو د کورنیو غړو مړي ترلاسه کړل او د کوټې د کوله پاټک په سیمه کې یې احتجاجي پرلت پیل کړ. له بل پلوه د هنه اوړک د برید پرضد هم د کوټې د هوايي ډګر سړک ترڅنګ د «بي اې مال» مخې ته له پنځو ورځو راهیسې پرلت روان دی.
پرون د دواړه پرلتونو ګډونوالو ته د بېلابېلو سیاسي ګوندونو مشرانو ویناوې وکړې. د پښتونخوا ملي عوامي ګوند مرکزي مشر نواب ایاز جوګېزي وویل، پښتانه له دې ډول پېښو سره بیا ـ بیا مخ شوي؛ خو د یوه ملت په توګه یې د مخنیوي لپاره لازم اقدام نهدی کړی.
هغه وویل، د دغه پرلت تر ټولو لوی درس دا دی چې پښتانه باید خپل ټول اختلافونه پای ته ورسوي او د خپلې خاورې د دفاع لپاره سره یو شي. جوګېزي زیاته کړه، بلوچستان د یوې مستعمرې په څېر اداره کېږي او له خلکو سره یې دوهمخیز چلند روان دی. د هغه په وینا؛ «یا به یو کېږو او یا به لهمنځه ورکېږو».
د پښتون ژغورنې غورځنګ د بلوچستان څانګې مشر نورباچا هم وویل، پنځه کاله وړاندې د مذاکراتو له لارې وسلهوال راوستل شول او بیا په خیبر پښتونخوا او بلوچستان کې ځای پرځای کړل شول.
هغه وویل، دوی د پوځي عملیاتو مخالف دي ځکه په خیبر پښتونخوا کې د عملیاتو په نوم زرګونه بېګناه خلک وژل شوي دي. نورباچا ادعا وکړه، چې همدا وسلهوال د دولت له لوري راوستل شوي او باید بېرته په هماغه لارو واېستل شي چې په کومه راغلي دي.
هغه زیاته کړه، «ریاست موږ ته امنیت نهدی راکړی؛ بلکې لاسونه یې زموږ په وینو سره دي». د پاکستان تحریک انصاف د ملي اسمبلۍ غړی عادل بازی هم پرلت ته وویل، چې د بلوچستان سر وزیر باید له خپلې دندې استعفا ورکړې وای.
هغه ادعا وکړه، چې د بلوچستان له خلکو سره خیانت شوی او که وضعیت همداسې دوام وکړي؛ نو دا به وروستی پرلت نهوي. بل لور ته سرچینو ویلي، چې د بلوچستان د امنیتي وضعیت د ارزونې لپاره به نن په کوټه کې د پاکستان د لومړي وزیر شهباز شریف په مشرۍ د اېپکس کمېټې غونډه وشي.د سرچینو په وینا؛ په غونډه کې به د بلوچستان سر وزیر، فدرالي وزیران او امنیتي چارواکي ګډون وکړي او د امنیتي وضعیت په اړه به مهمې پرېکړې وشي. د یادونې وړ ده، چې د جولای په پنځمه د کوټې د هنه اوړک په سیمه کې وسلهوالو پر ملکي وګړو برید وکړ چې له امله یې پنځه کسان وژل شوي او اووه نور ټپیان شوي دي او همداسې ۱۱ ځايي خلک لادرکه دي.همدارنګه، د زیارت ولسوالۍ د مانګي ډیم په سیمه کې د پولیسو پر یوې پوستې په برید او ورپسې د تښتول شویو سرتېرو په وژلو سره د وژل شویو پولیسو شمېر ۳۰ تنو ته رسېدلی دی. د دواړه بریدونو مسوولیت تحریک طالبان پاکستان (ټيټيپي) منلی دی.
