تحریک طالبان پاکستان (ټي ټي پي) په یوه خپره کړې ویډیو کې هغه کسان خلکو ته ښودلي چې د دغه ډلې په وینا، د بلوچستان د هرنایي ولسوالۍ د هنه اوړک په سیمه کې یې نیولي دي. ټي ټي پي ادعا کوي چې دغو کسانو د پاکستان د پوځ په ملاتړ د دوی پر ضد جګړه کوله.
په ویډیو کې د ټي ټي پي یو وسلهوال، چې د نیول شویو کسانو مخې ته ولاړ دی، وایي: «ستاسو بندیان نه ورک دي او نه هم وژل شوي، ټول همدلته ناست دي.»
په ویډیو کې یو تن وسله وال وایي: «یو تن ناروغ و، ډاکټر ته مو استولی، ټولو بندیانو ته چای او خواړه رسېدلي او د استراحت اسانتیاوې هم ورته برابرې شوې دي.»
هغه ادعا کوي چې دې ډلې له وړاندې سیمهییزو قومونو ته خبرداری ورکړی و چې د پاکستان له پوځ سره همکاري ونکړي، او دا جنګ چې د دوی په وینا د پاکستان د پوځ او طالبانو جنګ دی باید عام خلک ترې خپل اولادونه لرې وساتي.
یاد کس وایي: «دا د کفر او اسلام جګړه ده، د طالبانو او پوځ جګړه ده. موږ د خلکو د ملکیتونو د نیولو لپاره نه یو راغلي، خو دغو کسانو زموږ پر ضد لښکرکشي کړې وه، نو ځکه مو ونیول.»
دغه وسله وال کس په ویډيو کې خلکو ته په پېغام کې وایي، چې خپل ځوانان له دې جګړې لرې وساتئ. نوموړی زیاتوي: « ځکه که داسې ونه کړئ، وروسته به پښېمانه شئ، نه به د پاکستان پوځ درله پوښتنه وکړي او نه به بل څوک.»
هغه همداراز ادعا کوي: «پښتانه او بلوچ مظلوم قومونه دي، موږ کله هم پر مظلومانو ظلم نه کوو، زموږ هدف یوازې د پاکستان پوځ او استخباراتي ادارې دي.»
په ویډیو کې د ولي الرحمن په نوم د یوه نیول شوي کس یادونه هم کېږي او وسلهوال وایي: "ولي الرحمن د قومي مشرانو په ضمانت خوشې کوو."
د ټي ټي پي دغه ادعاوې تر اوسه د پاکستان د پوځ یا کومې خپلواکې سرچینې له لوري نه دي تایید شوې.
