د بلوچستان د زیارت ولسوالۍ له مانګي ډیم نه د تښتول شویو ۲۱ پولیسو مړي موندل شوي
د بلوچستان د زیارت ولسوالۍ د مانګي ډیم له سیمې څخه د تښتول شویو ۲۱ پولیس سرتېرو په ډزو وژل شوي مړي موندل شوي او د کوټې سول روغتون ته لېږدول شوي دي.
د کوټې د سول روغتون لهخوا په خپور شوي نوملړ کې راغلي، چې په وژل شویو کسانو کې ۱۴ کسان د زیارت، درې د سنجاوي، یو د موسیخېل، یو د لورلایي، یو د عبدالله کلا او یو هم د پنجاب د سرګودها ولسوالۍ اوسېدونکی دی.
د یادونې وړ ده، چې د جولای په ۶مه وسلهوالو د زیارت ولسوالۍ د مانګي ډیم په سیمه کې د پولیسو پر یوې پوستې برید وکړ. په دغه برید کې په لومړي سر کې نهه پولیس سرتېري وژل شوي وو او ۲۱ نور یې وسلهوالو تښتولي وو.
د دغه ۲۱ تښتول شویو سرتېرو له وژل کېدو سره په یاده پېښه کې د وژل شویو پولیسو شمېر ۳۰ ته رسېدلی دی. د پاکستان پوځ د عامه اړیکو څانګې ویاند احمد شریف چودري پرون په یوې خبري غونډه کې وویل، چې د زیارت د عملیاتو پرمهال ۱۵ وسلهوال هم وژل شوي دي.
بلخوا، په کوټه کې د هنه اوړک او زیارت د پېښو پرضد پیل شوی پرلت پنځمې ورځې ته هم غځېدلی دی. د پرلت ګډونوال وايي، تر هغو به خپل اعتراض ته دوام ورکړي؛ څو غوښتنې یې ونه منل شي.
پرلت کوونکي غواړي، چې د پاکستان له لومړي وزیر شهباز شریف او د پوځ له مشر سره مستقیمې خبرې وکړي.
