د بلوچستان په مستونګ ولسوالۍ کې دوه عیسوي ځوانان په ډزو وژل شوي
د بلوچستان د مستونګ ولسوالۍ د شمساباد په سیمه کې ناپېژاندو موټرسایکل سپرو دوه عیسوي ځوانان په ډزو وژلي دي. د پوليسو په وینا؛ دغه دوه ځوانان د کرېکټ په لوبه بوخت وو، چې وسلهوالو پرې ډزې وکړې او دواړه یې ووژل.
د لومړنیو معلوماتو له مخې؛ وژل شوي کسان ۲۱ کلن ایوش مایکل او ۲۴ کلن ساګر نومېدل. له پېښې وروسته د وژل شویو د کورنیو غړو، ښځو، ماشومانو او د عیسوي ټولنې لسګونه کسانو د اعتراض په توګه د دواړه ځوانانو مړي د نواب غوث بخش رییساني روغتون مخې ته کېښودل او د کوټې کراچۍ لویه لاره یې د هر ډول تګراتګ لپاره وتړله.
د اعتراض له امله د لویې لارې په دواړه خواوو کې د موټرو اوږده کتارونه هم جوړ شوي. پولیسو د پېښې په اړه پلټنې پیل کړې دي. د راپورونو له مخې؛ بریدګر له سیمې تښتېدلي دي.
