جرمني له متحده ایالاتو څخه «توماهاک» کروز توغندي اخلي او په خپله خاوره کې یې ځای پر ځای کوي. د جرمني صدراعظم فریدریښ مېرڅ د پنجشنبې په ورځ وویل چې دا اقدام د برلین د خپلواکې اوږدواټنه دفاعي وړتیا د پیاوړتیا پر لور یو بدلون دی.
مېرڅ قانون جوړوونکو ته وویل چې نوموړي د امریکا له حکومت سره دا هوکړه په انقرې ښار کې د ناټو د سرمشریزې په څنډه کې کړې ده. هغه زیاته کړه چې د سې شنبې او چارشنبې ورځې خبرې اترې د ده له تمې هم غوره وې.
مېرڅ وویل: « موږ په خپل دفاعي سیستم کې یوه مهمه ستراتیژیکه تشه له منځه وړو او په ورته وخت کې کار کوو چې خپل اروپايي سیستمونه جوړ کړو او په اروپا کې یې ځای پر ځای کړو».
د جرمني حکومتي سرچینو له مخې، واشنګټن ژمنه کړې چې د اګست په میاشت کې به جرمني ته د توماهاک توغندیو او اړوندو ځمکنیو «ټایفون» توغګرو د پېرلو اجازه ورکړي. دا ژمنه د سې شنبې په ورځ د لاسلیک شوې موافقې له لارې شوې ده.
جرمني به څومره توغندي او توغګر اخلي، دا معلومات لا هم پټ ساتل شوي او محرم بلل شوي دي.
جرمني خپل کروز توغندي هم جوړوي چې «تورس»نومېږي، خو واټن یې شاوخوا ۵۰۰ کیلومتره دی، چې د توماهاک توغندیو له واټن څخه درې تر پنځه ځله کم دی.
