په کابل کې د ترکیې ویزو یو غوښتونکي افغانستان انټرنشنل ته ویلي، چې د دغه هېواد سفارت له محصلینو، ناروغانو او مراجع کوونکو څخه په بېلابیلو پلمو لوړ لګښتونه اخلي. نوموړي ویلي، د ویزو بهیر ته ځانګړې روغتیايي معاینه، د ځینو اسنادو ژباړه او د اسنادو قانوني کول اضافه شوي.
دغه کس افغانستان انټرنشنل ته ویلي، چې مخکې د ترکیې سفارت د لګښت او ویزې شرکت په نوم ۲۰۰ ډالر او ۲زره افغانۍ اضافه پیسې اخیستې؛ خو اوس یې نور لګښتونه هم اضافه کړي.
نوموړي زیاته کړې، د ترکیې سفارت د چنار په نوم روغتون پرته د بل هېڅ روغتون طبي معاینه نه مني. هغه ویلي، که رښتیا هم موخه روغتیايي ارزونه وي؛ نو باید د ټولو روغتونونو معاینات ومنل شي.
دغه کس زیاته کړې، له پرون راهیسې د اسنادو ژباړه جبري شوې او له یوه ځانګړي شرکت سره په دې اړه قرار داد شوی او ټول اسناد به ترکي ژبې ته ژباړل کېږي. د هغه په خبره؛ د پاسپورټ، ډيپلوم او ټرانسکریپټ د ژباړې لپاره به مخکې ۳۰۰ افغانۍ اخیستل کېدې؛ خو اوس ۵۵ ډالر چې شاوخوا ۳۵۰۰ افغانۍ کېږي غواړي.
نوموړي ویلي، چې د اسنادو د قانوني کېدو او د یو خاص مهر په لګولو سره سفارت ۶۰ ډالر اخلي. دغه کس ټینګار کړی، چې په دې برخه کې ډېری د ویزو ترلاسه کوونکي او په ځانګړې توګه محصلین له ستونزو سره مخ شوي دي.
هغه زیاته کړې: «یو محصل چې غواړي په ترکیه کې زدهکړې وکړي، د ویزې د بهیر له سرګردانۍ او د ویزې ترلاسه کېدو له اندېښنې سره، سره اړ دی چې درانه لګښتونه هم پرې کړي». دغه کس ویلي، چې د ترکیې سفارت د ویزو بهیر د ورځني عاید په یوې سرچینې بدل کړی.
