د امریکا د بهرنیو چارو وزارت یوې ویاندې الیزابت سټیکني افغانستان انټرنشنل ته وویل، چې ولسمشر ډونالډ ټرمپ د ایران له کړکېچ سره د مقابلې لپاره ډیپلوماټیکه حللاره غوره بولي، خو د اړتیا په صورت کې نور انتخابونه هم پر مېز لري.
نوموړې د پنجشنبې په ورځ له افغانستان انټرنشنل سره په مرکه کې د ناټو د سرمشریزې په څنډه کې د ایران او امریکا د وروستیو کړکېچونو په اړه وویل، «د امریکا حکومت په دې باور دی چې د هرمز تنګي کې د ایران له لوري پر سوداګریزو بېړیو بریدونه د دواړو هېوادونو ترمنځ د هوکړې ښکاره سرغړونه وه».
هغې زیاته کړه، چې د همدې دلیل له مخې امریکا پوځي ځواب ورکړ، څو په هرمز تنګي کې د بېړۍ چلونې د ګواښلو لپاره د ایران وړتیا کمزورې کړي.
د امریکا د بهرنیو چارو وزارت ویاندې وویل، د ولسمشر ټرمپ لومړیتوب لا هم ډیپلوماسي ده او واشنګټن غواړي د کړکېچ د حل لپاره سیاسي او ډیپلوماټیکه لاره ومومي، خو ټینګار یې وکړ چې د امریکا حکومت نور انتخابونه هم په واک کې لري.
الیزابت سټیکني همداراز د افغانستان په اړه وویل چې طالبان لا هم د «یرغملنیونې سیاست» ته دوام ورکوي او واشنګټن د هغو ټولو امریکايي وګړو د ازادېدو غوښتنه کوي چې په افغانستان کې په ناحقه نیول شوي دي.
سټیکني له افغانستان انټرنشنل سره په مرکه کې ټینګار وکړ چې د امریکايي وګړو ملاتړ او د امریکا د ملي ګټو ساتنه د افغانستان په اړه د ټرمپ د حکومت له مهمو لومړیتوبونو څخه دي.
هغې وویل، له ترهګرۍ سره مبارزه لا هم په افغانستان کې د واشنګټن له مهمو ملي ګټو څخه شمېرل کېږي.
د امریکا د بهرنیو چارو وزارت ویاندې د افغانستان د ښځو او نجونو د بشري حقونو وضعیت «وحشتناک» وباله او له طالبانو یې وغوښتل چې د هغوی د حقونو نقض پای ته ورسوي.
سټیکني دې پوښتنې ته په ځواب کې چې ایا امریکا د افغانستان د وضعیت د بدلون لپاره کوم پلان لري، وویل: «موږ فعال یو»، خو د امریکا د حکومت د اقداماتو په اړه یې نور جزییات ورنه کړل.
