په برېتانیا کې پر افغان جوړې نژادي برید؛ «موږ ته یې ویل بېرته خپل هېواد ته ولاړ شئ»
په برېتانیا کې یوې افغانې جوړې ویلي، چې د شیفیلډ ښار په هیلزبرو پارک سیمه کې د ځوانانو یوې ډلې پرې نژادي برید کړی، وهلي یې دي او سپکاوی یې ورته کړی. دوی وایي، چې له شاوخوا شلو کلونو راهیسې په برېتانیا کې ژوند کوي او دواړه د روغتیا ملي ادارې کارکوونکي دي.
دوی چې د محرمیت له امله یې خپل اصلي نومونه نهدي خپاره کړي وایي، (د جون په ۲۶مه) د ماښام پرمهال شاوخوا ۱۵ بایسکل سپرو ځوانانو پرې برید کړی او سپکاوی یې ورته کړی.
دغه افغانه مېرمن وایي بریدګرو ورته ویل: «بېرته خپل هېواد ته ولاړ شئ». د نوموړې خاوند وایي، یو بریدګر ورته د چړې برید ګواښ هم کړی و.
د سویلي یارکشایر پولیسو د نژادي انګېزې لرونکی برید تایید کړی او ویلي یې دي، چې د یادې قضیې په تړاو پلټنې روانې دي. د راپور له مخې؛ په وروستیو اوونیو کې د هیلزبرو پارک په سیمه کې د بایسکل سپرو ځوانانو له لوري د ډبرو ویشتلو، ګواښونو او ورانکارۍ څو نورې پېښې هم ثبت شوې دي.
ځايي پولیس وايي، په دې تړاو یې درې تنه نیولي، دوه ناقانونه موټرسایکلونه یې ضبط کړي او د سیمې د امنیت لپاره یې نور اقدامات هم پیل کړي دي.
