قطر: د هرمز تنګي بریدونه د سیمه‌ییز ثبات لپاره روانې هڅې له ګواښ سره مخ کوي

شیخ محمد بن عبدالرحمان ال ثاني په هرمز تنګي کې پر سوداګریزو کښتیو بریدونه وغندل او ویې ویل، دغه بریدونه د تاوتریخوالي د کمښت له هڅو سره هم‌مهاله ترسره شوي او د سیمې د امنیت او ثبات په زیان دي.
د قطر لومړي وزیر ټینګار وکړ، چې دغه ډول بریدونه پر نړۍوال سمندري امنیت منفي اغېز کوي، د باور فضا کمزورې کوي او د سیمه‌ییز ثبات لپاره روانې هڅې له ګواښ سره مخ کوي.
هغه همداراز له ټولو خواوو وغوښتل، چې خبرو او ډیپلوماسۍ ته ژمن پاتې شي او د تفاهم‌لیک پربنسټ شوې هوکړې عملي کړي؛ څو د سیمې امنیت، وروستۍ لاسته راوړنې او ثبات خوندي پاتې شي.
د خبرپاڼې له مخې؛ د قطر لومړي وزیر یو ځل بیا ټینګار کړی، چې هېواد یې د تاوتریخوالي د مهار، د هر اړخیزې هوکړې د ترلاسه کولو او په سیمه کې د تلپاتې سولې او ثبات د ټینګښت لپاره له ټولو هڅو ملاتړ کوي.