د افغان ایلېون لوبډلې او د ازبکستان د کرېکټ ملي لوبډلې تر منځ یوازینۍ شل اوریزه دوستانه سیالي نن په خوست کې ترسره شوه او افغان لوبډلې د ازبکستان لوبډلې ته د ۱۹۹ منډو په توپیر ماتې ورکړه.
د لوبې پچه د ازبکستان لوبډلې وګټله او د افغان ایلېون لوبډلې په وړاندې یې د توپ اچونې پریکړه وکړه.
د لوبې په لومړی برخه کې افغان ایلېون لوبډلې د حسن عیسی خېل ۱۲۰ او عمران میر ۷۴ منډو په مټ سیالي لوبډلې ته په شل اورونو کې د ۳۲۴ منډو هدف وټاکه.
د لوبې په دوهمه برخه کې د ازبکستان لوبډلې ونه شو کړای ټاکل شوی هدف پوره کړي او افغان لوبډلې د ۱۹۹ منډو په توپیر سیالي لوبډلې ته ماتې ورکړه.
د افغانستان کرېکټ بورډ اعلان کړی چې افغان ایلېون لوبډله به سبا د ازبکستان د کرېکټ ملي لوبډلې پر وړاندې د یوولسم پړاو «ای انډ شپږیزه کرکټ لیګ سوپرکولا» په لړ کې یوازینۍ شل اوریزه دوستانه سیالي ترسره کړي.
د افغانستان کرېکټ بورډ د معلوماتو له مخې، دغه سیالي چې د پخواني ملي لوبغاړي شاپور ځدراڼ د مړینې له امله د شپږیزې کرکټ لیګ له ځنډ وروسته ترسره کېږي، د افغانستان پر وخت به سبا سهار ۹:۰۰ بجې پیل شي.
کرېکټ بورډ ویلي چې د شپږیزې کرکټ لیګ د سیالیو په مهالوېش کې بدلون راوستل شوی او د نوي مهالوېش له مخې به افغان ایلېون لوبډله د ازبکستان د کرېکټ ملي لوبډلې پر وړاندې د «ای انډ یوازېنۍ شل اوریزې سوپرکولا لوبې» لپاره میدان ته ښکته شي.
د دې ترڅنګ، د شپږیزې کرکټ لیګ د سیالیو په دوام کې به د بند امیر ښاماران لوبډله د لیګ په ۱۲مه لوبه کې له بست ساتونکو لوبډلې سره مخامخ شي.
د افغانستان کرېکټ بورډ ویلي، د شاپور ځدراڼ د مړینې له امله د درناوي په موخه د شپږیزې لیګ سیالۍ دوه ورځې ځنډول شوې وې، چې اوس به د نوي مهالوېش له مخې بېرته دوام وکړي.
افغان ایلېون لوبډله له ازبکستان سره دا سیالي داسې مهال ترسره کوي چې د دواړو هېوادونو د کرېکټ اړیکې د پراختیا په حال کې دي او دا لوبه د ازبکستان لوبډلې لپاره هم د نړیوالو سیالیو د تجربې ترلاسه کولو یو فرصت بلل کېږي.
د نیویارک ښاروال زهران ممداني د ۲۰۲۶ نړیوال جام د یو پر اتم پړاو کې له ارجنټاین سره د مصر د ملي لوبډلې د جنجالي ماتې په غبرګون کې د لوبڅارۍ پر پرېکړو نیوکه کړې او ویلي یې دي، مصر د بېعدالتۍ قرباني شوی او حق یې غلا شوی دی.
د مصر او ارجنټاین لوبه، چې ارجنټاین په ۳-۲ وګټله، د لوبڅار او ویډیویي مرستندویه لوبڅار د څو بحثپارونکو پرېکړو له امله د مصريانو له پراخو اعتراضونو سره مخ شوه.
د مصر د ملي لوبډلې روزونکي حسام حسن او یو شمېر لوبغاړو تر لوبې وروسته ادعا وکړه چې لوبڅاري د ارجنټاین په ګټه شوې ده. د مصر د لوبډلې یوه لوبغاړي ان نړیوال جام «له مخکې طرحه شوی» وباله.
ممداني، چې د نیویارک د بسونو د ترانسپورتي سیستم د ښهوالي د طرحې د پرانیستې په مراسمو کې خبرې کولې، وویل د دې پروژې له برکته به خلک هر کال له دوو ورځو ډېر د تګ راتګ وخت سپموي.
هغه د ټوکې په انداز وویل: «دا وخت به د کورنۍ سره د سهارنۍ خوړلو، د خپلو ماشومانو د لوبو د لیدلو او له ملګرو سره د دې خبرې د منلو لپاره ولرئ چې مصر پرون د بېعدالتۍ قرباني شو».
د نیویارک ښاروال د دې پوښتنې په ځواب کې، چې هره ورځ له سپمول شویو شپږو دقیقو سره به څه کوي وویل: «ښايي د مصر د غلا شوي حق صحنې بیا بیا وګورم. یوازې کافي ده د ویډیویي مرستندویه لوبڅار پرېکړه یو ځل بیا وګورئ».
د مصر اعتراضونه هغه وخت نور هم زیات شول چې د دویمې نیمایي پر مهال د مصطفی زیکو ګول، د مرستندویه لوبڅار له ارزونې وروسته، د برید د پیل په بهیر کې د یوې خطا له امله مردود اعلان شو. دغه پرېکړه د مصر د لوبغاړو او روزنیز کادر له سخت غبرګون سره مخ شوه او د مصر د فوټبال فدراسیون د همدې موضوع په تړاو فیفا ته رسمي شکایت هم ثبت کړی دی.
د افغانستان د کرېکټ ملي لوبډلې پخواني تیز توپ اچوونکي شاپور ځدراڼ پلار د خپل زوی د جنازې په مراسمو کې د افغانستان له کرېکټ بورډ څخه غوښتنه وکړه، چې په کابل کې د کرېکټ جوړېدونکی لوبغالی د شاپور ځدراڼ په نوم ونوموي.
د افغانستان د کرېکټ ملي لوبډلې پخوانی لوبغاړی شاپور ځدران چې له اوږدې ناروغی وروسته په هند کې ومړ، د پنجشنبې په ورځ په کابل کې خاورو ته وسپارل شو.
د نوموړي د جنازې په مراسمو کې د افغانستان د کرېکټ د ملي لوبغاړو ترڅنګ د هغه زرګونو مینهوالو ګډون کړی و.
د شاپور ځدراڼ د جنازې پرمهال د هغه پلار له افغان کرېکټ بورډ څخه غوښتنه وکړه چې د شاپور د خدمتونو د یاد په موخه دې په کابل کې د کرېکټ جوړیدونکی لوبغالی د هغه په نوم ونومول شي.
شاپور ځدراڼ د پکتیا ولایت اوسېدونکی و او د افغانستان د کرېکټ د لومړي نسل لوبغاړو څخه شمېرل کېده.
نوموړي د افغانستان لپاره لومړۍ شل اوریزه نړۍواله لوبه په ۲۰۱۰ کې او وروستۍ په ۲۰۲۰ کې ولوبوله او همدارنګه لومړۍ پنځوس اوریزه نړۍواله لوبه یې په ۲۰۰۹ کې او وروستۍ یې په ۲۰۱۹ کې وکړه.
شاپور ځدراڼ د افغانستان لپاره ۴۳ یو ورځنۍ او ۳۲ شل اوریزې لوبې کړې دي.
د کرېکټ بورډ مسوولینو، د ملي لوبډلې لوبغاړو او په زرګونه هېوادوالو د افغان کرېکټ ستوري شاپور ځدراڼ جنازه د کابل په عیدګاه جومات کې ترسره او په مرنجان غونډۍ کې یې خاورو ته وسپارله.
د شاپور ځدراڼ پلار له ټولو ګډونوالو مننه کړې، چې په یاد درد او غم کې یې ورسره برخه اخیستې. هغه له کرېکټ بورډ غوښتنه وکړه، چې د لوبغاړو او هېوادوالو په مشوره دې د کرېکټ نوی جوړېدونکی لوبغالی د شاپور ځدراڼ په نوم کړي.
ورته مهال د طالبانو د اطلاعاتو او فرهنګ وزارت د کرېکټ په برخه کې د شاپور ځدراڼ مړینه لویه ضایعه بللې او ژمنه یې کړې، چې دوی به د شاپور پر لوبیز ژوند مستند جوړ کړي.
د کرېکټ نړۍوالې شورا (ICC) مشر جي شاه د افغانستان د کرېکټ د پخواني لوبغاړي شاپور ځدراڼ پر مړینه خواشینې څرګنده کړې او ویلي یې دي، چې د نوموړي یاد به د افغانستان د نړۍوال کرېکټ په پرمختګ کې د خپل مهم رول له امله تل ژوندی وي. د کرېکټ نړۍوالې شورا مشر د شاپور ځدراڼ له کورنۍ، دوستانو او د افغانستان د کرېکټ له ټولې کورنۍ سره خپله ژوره خواخوږي څرګنده کړې ده.
نورو نړۍوالو پخوانیو او اوسنیو لوبغاړو، د کرېکټ لوبې نړۍوالو مبصرینو، افغان لوبغاړو او په زرګونه کسانو د شاپور ځدراڼ پر مړینه خواشینې ښودلې او افغانانو ته یې تسلیت ویلی.
د افغانستان د اسلامي جمهوریت د سیاسي او قونسلي استازولیو د همغږۍ شورا د افغانستان د کریکټ ملي لوبډلې د پخواني نامتو لوبغاړي شاپور ځدراڼ مړینه د کرېکټ او هېواد لپاره لویه ضایع بللې ده.
په یو رسمي پیغام کې، چې د چنګاښ په ۱۷مه خپور شوی، د افغانستان د اسلامي جمهوریت د سیاسي او قونسلي استازولیو د همغږۍ شورا د شاپور ځدراڼ کورنۍ، خپلوانو، د هېواد د کریکټ ملي لوبډلې غړو او ټولو ورزشپالو ته خپله ژوره خواخوږي او تسلیت وړاندې کړی دی.
د همغږۍ شورا په خپل پیغام کې زیاته کړې، چې ارواښاد شاپور ځدراڼ د خپل ځانګړي استعداد، ملي ژمنتیا او نه ستړې کېدونکو هڅو له لارې د نورو غښتلو لوبغاړو تر څنګ، په نړیوالو ډګرونو کې د افغانستان ملي بیرغ رپانده وساتلی و. د دغې شورا په وینا، نوموړي د افغانستان د کرېکټ په نړیوال معرفي کولو کې خورا ارزښتمنه او تاریخي ونډه درلوده او د هغه میراث به د هېواد د ورزشي تاریخ یوه روښانه برخه پاتې شي.
د دغه پخواني ملي لوبغاړي مړینې په کورني او نړیوال کچه د کریکټ مینه وال او لوبغاړي د خپګان په ټغر کېنولي دي. د افغانستان کرېکټ بورد هم د نوموړي د مړینې له امله د درناوي او همدردۍ په توګه د اشپګیزه کریکټ لیګ سیالۍ د دوو ورځو لپاره وځنډولې ترڅو د هېواد د دغه پخواني ستوري له کورنۍ سره غمشریکي وشي.
له بلې خوا، د شاپور ځدراڼ جسد نن له هندوستان څخه کابل ته انتقال شو او هلته د کرېکټ د اوسنیو او پخوانیو ستورو، د ورزشي ادارو د مسوولینو او په سلګونو مینه والو له خوا یې تود هرکلی وشو. د کرېکټ د دغه پیاوړي لوبغاړي جسد د کابل په هوایي ډګر کې د هغه د هملوبو او مینه والو پر اوږو بدرګه شو او د خاورو ته سپارلو لپاره چمتو شو.