د هسپانیا په ځنګلونو کې د اور لګېدو له امله ۱۱ کسان مړه شوي او ۱۹ نور لادرکه دي
د هسپانیا په سویل کې د ځنګلي اورلګېدنې له امله لږ تر لږه ۱۱ کسان مړه او ۱۹ نور لادرکه شوي دي. د اندلس سیمې د بېړنیو پېښو د ادارې مشر انتونیو سانز ویلي چې په مړو شویو کسانو کې یو تن د اسپانیا وګړی دی او نور ټول بهرني سیلانیان ښکاري.
د اندلس سیمې د بېړنیو پېښو د ادارې مشر انتونیو سانز وویل، دغو کسانو په خپلو ځایونو کې د پاتې کېدو لارښوونې له پامه غورځولې وې او د الیمریا ولایت په لوس ګالاردوس سیمه کې یې د موټرو په واسطه د تېښتې هڅه کوله، چې د اور په لمبو کې بند پاتې شول.
انتونیو سانز زیاته کړې، چې په یوه موټر کې څلور تنه مړه شوي، چې د موټر د ښي لوري سټیرینګ څخه ښکاري چې برېتانویان وو.
نوموړي وویل، چې اووه تنه نور له خپلو موټرو څخه د ښکته کېدو او په پښو د تېښتې پر مهال مړه شوي دي، ځکه دغه لاره د تخلیې په رسمي پلان کې شامله نه وه.
د کارپوهانو په وینا، د دوبي په لومړیو کې پرله پسې تودوخې د هسپانیا ځمکې وچې کړې او د ځنګلي اورلګېدنې فصل یې له وخته مخکې پیل کړی دی.
د روان کال له پیله تر اوسه په دغه هېواد کې شاوخوا ۵۷ زره هکتاره ځمکه سوځېدلې، چې دا په اروپايي ټولنه کې د ټولو سوځېدلو سیمو ۴۰ سلنه برخه جوړوي.
