له پاکستان نه تر جبري اېستلو وروسته؛ افغان ډاکتران وایي اړوندې ادارې یې غږ نه اوري
د پاکستان د پنجاب ایالت پولیسو لهخوا د ۱۱ افغان ډاکټرانو او د طب محصلانو له جبري ستنولو وروسته، د دغه کسانو له ډلې یو ډاکټر افغانستان انټرنشنل پښتو ته په لېږلي پیغام کې ویلي، چې په افغانستان کې اړوندې ادارې د دوی ستونزو ته پاملرنه نهکوي.
هغه وایي، نه د ملګرو ملتونو د کډوالو عالي کمېشنرۍ ورسره مرسته کړې، نه هم د طالبانو د بهرنیو چارو وزارت او نه هم په پاکستان کې د طالبانو سفارت د دوی ستونزې هوارې کړې دي. د هغه په وینا؛ دوی د طالبانو د بهرنیو چارو وزارت له ځینو کارکوونکو سره د اړیکې پرمهال له نامناسب چلند سره هم مخ شوي دي.
نوموړي زیاته کړې، دوی هیله لرله چې افغانستان ته تر ستنېدو وروسته به یې ستونزې حل شي؛ خو تراوسه هېڅ ادارې ورته پاملرنه نهده کړې. دغه ډاکټر وایي، په اسلاماباد کې د طالبانو سفارت ورته ویلي و چې افغانستان ته تر رسېدو وروسته به د بهرنیو چارو وزارت د دوی قضیه وڅاري؛ خو د سفارت له مرستیالانو سره له اړیکو وروسته ورته ویل شوي، چې د دوی لپاره هېڅ اقدام نهشي کولای.
هغه زیاتوي، چې د بېلابېلو ستونزو له امله لا هم نهدي توانېدلي له خپلو کورنیو سره یوځای شي. څو ورځې وړاندې د پاکستان د پنجاب ایالت پولیسو ۱۱ افغان ډاکټران او د طب محصلان ونیول، چې د دغه ایالت په بېلابېلو طبي پوهنتونونو او ښوونیزو روغتونونو کې یې تخصصي او طبي زدهکړې کولې.
د دغه ډاکټرانو له ډلې لس تنه د بهاولپور ولسوالۍ د قایداعظم طبي کالج او بهاولپور ښوونیز روغتون کې په تخصصي زدهکړو بوخت وو. دغه ډاکټرانو تر دې وړاندې ویلي و، چې د پاکستان او طالبانو ترمنځ د اړیکو له خرابېدو وروسته له شاوخوا شپږو میاشتو راهیسې افغان محصلان تر زیات فشار لاندې دي او د دوی د ویزو موده نه تمدیدېږي.
دوی ټینګار کړی، چې تخصصي او طبي زدهکړې یې باید نیمګړې پاتې نهشي او د سیاسي اختلافونو قرباني نهشي. هغوی پر طالبانو هم غږ کړی، چې له پاکستاني چارواکو سره خبرې وکړي او د دوی د ویزو او زدهکړو ستونزې هوارې کړي.
