شپږیزه لیګ؛ امو نهنګانو سپین غر او مس عینک بست ته ماتې ورکړه
د شپږیزې لیګ په لومړی سیالۍ کې امو نهنګانو د سپین غر بازانو لوبډلې ته د ۸ ویکټو په توپیر او دویمه سیالۍ کې بیا مس عینک اتلانو د بست ساتونکو ته د درې ویکټو په توپیر ماتې ورکړه.
لومړۍ لوبه د امو نهنګانو او سپین غر بازانو لوبډلو ترمنځ تر سره شول او امو نهنګانو د پچې په ګټلو سره لومړی د توپ اچونې پرېکړه وکړه.
د لوبې په لومړۍ برخه کې سپین غر بازانو د ۷ لوبغاړو په زیان سره امو نهنګانو ته د ۱۶۸ منډو هدف وټاکه.
د لوبې په دوهمه برخه کې امنو نهنګانو لوبډلې ټاکل شوی هدف د لوبې په ۱۷،۲ اورونو کې پوره کړ او سپین غر بازانو ته یې د ۸ ویکټو په توپیر ماتې ورکړه.
دویمه لوبه د بست ساتونکو او مس عینک اتلانو ترمنځ تر سره شوه. د لوبې پچه د بست ساتونکو وګټله او لومړی یې د توپ وهنې پریکړه وکړه.
بست ساتونکو د لوبې په لومړی برخه کې د ۷ لوبغاړو په زیان سره سیالي لوبډلې ته د ۱۷۸ منډو هدف ورکړ. خو د بست ساتونکو له ټاکل شوې هدف څخه دفاع ونه شوای کړای او د مس عینک اتلانو ټاکل شوی هدف د لوبې په وروستي اور کې پوره او لوبه یې د درې ویکټو په توپیر وګټله.
