پر اوکراین د روسیې په تازه توغندیزو او ډرون بریدونو کې ۶ کسان وژل شوي او لسګونه نور ټپیان دي. کیېف دا بریدونه په داسې حال کې تاییدوي، چې د هوايي دفاعي مهماتو له سخت کمښت سره مخ دی او له خپلو لوېدیځو متحدینو څخه یې د بېړنیو پوځي مرستو غوښتنه کړې ده.
د اوکراین ځايي چارواکي وايي، د دغه هېواد په شمالي ښار سومي کې د روسیې د دوو لویو بمونو د لګېدو له امله ۴ کسان مړه او ۱۷ نور ټپیان شوي دي؛ یو له دغو بمونو د بسونو پر یوې تمځای لګېدلی دی. دغه راز، د اوکراین په سویل کې پر ادیسه بندري ښار د توغندیز برید له امله ۲ کسان مړه او یو بل ټپي شوی او په ختیځ ښار خارکیف کې پر یوه ملکي شرکت د ډرون برید له امله ۷ کسان ټپیان شوي دي. په پلازمېنه کیېف کې هم د شپې ناوخته د بالیستیک او کروز توغندیو او ډرون بریدونو له امله ۱۱ کسان ټپیان شوي دي.
بل لور ته، اوکراین د روسیې پر پوځي لوژستیک او د تېلو پر سرچینو فشارونه زیات کړي دي. د اوکراین د ډرون ځواکونو مشر رابرټ بروفدي وویل، د دوی ځواکونو د ازوف په سمندرګي کې د روسیې د تېلو پر ۲۱ کښتیو او ۷ نورو سوداګریزو کښتیو بریدونه کړي، چې په دې سره پدې اونۍ کې د ویشتل شویو روسي کښتیو شمیر ۷۶ ته ورسېد. روسي چارواکو منلې چې د ازوف په سمندرګي کې پر څلورو کښتیو د ډرون برید له امله یو تن مړه شوی دی. د روسیې د دفاع وزارت هم ویلي، چې د دوی هوايي دفاعي واحدونو په بېلابېلو سیمو کې ۱۷۸ اوکرایني ډرون الوتکې نسکورې کړې دي.
