د سوریې نوي پارلمان یکشنبې په ورځ د چنګاښ پر ۲۱مه د لومړي ځل لپاره په دمشق کې غونډه کړې ده. الشرع په دمشق کې پارلمان ته په خپله وینا کې له وکیلانو وغوښتل چې «دا شورا د مسوولیت او وړتیا یوه نمونه کړي» او دا یې «د حقیقت او عدالت ټربیون» وباله.
هغه وویل: «سوریه یو داسې ویاړلی تاریخ لیکي چې د هغې اتلولي منعکسوي او موږ د ملت او فرد دواړو د جوړولو له مسوولیت سره مخ یو.»
دغه پارلمان ته په سوریه کې د یوه ټولشموله نوي نظم د جوړولو لپاره د الشرع د ژمنې د ازموینې په توګه لیدل کیږي.
د سوریې د لنډمهاله حکومتي ترتیباتو له مخې، د ۲۱۰ څوکیو لرونکي پارلمان دوه پر درېیمه برخه غړي تېر کال د سیمه ییزو ټاکنیزو حوزو له خوا غوره شوي وو او پاتې یو پر درې برخه یې د جولای په لومړۍ نېټه د احمد الشرع له خوا ونومول شول.
چارواکو ویلي دي چې دا سیسټم ځکه اړین و چې د کلونو جګړې له امله میلیونونه خلک بې ځایه شوي وو او دا یې ناممکنه کړې وه چې د نفوس پر کره شمېر یا د رایې ورکوونکو پر لېستونو تکیه وشي.
دا پارلمان ۲۱ ښځینه وکیلانې لري چې له دې جملې ۱۵ یې احمد الشرع نومولې دي.
