ایران: د کویټ او بحرین کې مو د امریکا پر پوځي تاسیساتو د بېپیلوټه الوتکو بریدونه کړي
د ایران سياه پاسداران ځواکونو ویلي، چې په کویټ او بحرین کې د امریکا پر پوځي تاسیساتو د بېپیلوټه الوتکو بریدونه کړي دي. تهران دا اقدام د امریکا د «دوامداره بریدونو» په غبرګون کې بللی او د نورو بریدونو د دوام خبرداری یې ورکړی دی.
د ایران د پوځ د عامه اړیکو د خبرپاڼې له مخې، د ایران پوځ د امریکا پر پوځي مرکزونو د بېپیلوټه الوتکو د بریدونو نوې څپه پیل کړې ده.
د ایران پوځ ادعا کړې چې په کویټ کې یې د امریکا د پوځي ځواکونو د «پېټریوت» دفاعي سیستم، د مهماتو زېرمتون او راداري مرکزونه په نښه کړي دي.
د ایران د پوځ په وینا، په یوه بله بېله حمله کې د بحرین په خاوره کې د امریکا د پوځ د مخابراتي سیستم او راداري مرکز هم هدف ګرځول شوی دی.
د ایران پوځ په خبرپاڼه کې ویلي: «د سیمې د ناامنۍ او د دغو اقداماتو پایلې به د امریکا او اسراییلو پر غاړه وي. که دا بریدونه تکرار شي، سختو ځوابونو ته به مخه کړو.»
تر اوسه د امریکا، کویټ او بحرین چارواکو د ایران د دغو ادعاوو په اړه رسمي څرګندونې نه دي کړې.
