وال سټریټ ژورنال: ایران غواړي د هرمز تنګي نفوذ پراخه کړي

د امریکا مرکزي قومندانۍ په یوه بیان کې ویلي، چې د امریکا پر وخت د ماښام په ۷:۱۵ بجو یې ځواکونه وروسته له هغې پر ایران د بریدونو درېیم پړاو پیل کړ، چې د ایران د اسلامي انقلاب ساتونکو ځواکونو د هرمز تنګي له لارې پر روانې د قبرس بیرغ لرونکې کانټینري بېړۍ M/V JFS Galaxy برید وکړ.

د سنټکام د معلوماتو له مخې، په دې برید کې د بېړۍ یو ملکي عمله‌غړی ورک شوی او بېړۍ د عرشې د اورلګېدنې او د انجن خونې د پراخ زیان له امله د خپل سفر د دوام وړتیا له لاسه ورکړې ده.

سنټکام ادعا کړې چې ایران تر دې مخکې هم پر سوداګریزو بېړیو د بریدونو مسول بلل شوی و او «د تفاهم یادښت ته د ژمنتیا د ښودلو لپاره یو بل فرصت هم ورکړل شو، خو بیا هم په دې برخه کې پاتې راغی.»

د امریکا مرکزي قومندانۍ زیاته کړې: «متحده ایالات به د هغو بریدیزو وړتیاوو په کمزوري کولو سره، چې ایران یې د ملکي سمندري کارکوونکو او سوداګریزو بېړیو پر ضد کاروي، پر تهران دروند لګښت تحمیل کړي.»

سنټکام ویلي، دغه بریدونه د امریکا د وسله‌والو ځواکونو د اعلی سرقوماندان په امر ترسره کېږي.

د بنګله‌دېش د طبیعي پېښو په وړاندې د مبارزې وزارت د شنبې په ورځ اعلان وکړ چې د دغه هېواد په اوو سویل ختیځو ولسوالیو، چاټوګرام، کوکس بازار، بندر‌بان، رانګامتي، خاګراچاري، مولوي‌بازار او هابيجنګ کې سېلابونو د خلکو عادي ژوند ګډوډ کړی او شاوخوا ۲۶۷ زره او ۹۱۸ کورنۍ یې په خپلو کورونو کې ایسارې کړې دي.

د بنګله‌دېش پوځ او سمندري ځواکونو د کښتیو په وسیله اغېزمنو شویو سیمو ته خواړه، څښاک اوبه، درمل او نور اړین توکي لېږدوي.

د دغه هېواد د طبیعي پېښو په وړاندې د مبارزې او مرستو وزیر اقبال حسین چاټوګرام ته د سفر پر مهال وویل چې حکومت د سېلاب ځپلو د ملاتړ لپاره ټولې شونې هڅې کوي او له هغو خلکو یې وغوښتل هغه کسان چې کورونه یې اوبو لاندې کړي، نږدې پناه ځایونو ته دې ولېږدول شي.

زیلنسکي په خپل ایکس پاڼه کې لیکلي چې د روسیې په بریدونو کې په کییف کې ملکي زیربناوې، د استوګنې ودانۍ، دفترونه او یوه دیني مدرسه زیانمنه شوې او بیړني ژغورونکي ټیمونه د بریدونو په ځایونو کې د ژغورنې او بیارغونې چارې پر مخ وړي.

هغه زیاته کړې چې د اودیسا، سومي، خارکیف او چرنیهیف په سیمو کې هم د بریدونو له امله د زیانونو د ارزونې او بیارغونې هڅې روانې دي.

د اوکراین ولسمشر ویلي: «روسیې د شپې له خوا له ۱۲۰ څخه ډېرې بې‌پیلوټه الوتکې او ۱۲ توغندي وتوغول چې نیمايي یې بالستیک توغندي وو.»

زیلنسکي ادعا کړې چې د اوکراین هوايي مدافع ځواکونو د بریدونو ډېری هدفونه شنډ کړي، خو بالستیک توغندي یې نه دي توانېدلي چې نسکور کړي.

هغه له نړیوالو متحدانو وغوښتل چې د ناټو په وروستۍ سرمشریزه کې د شوې ژمنې له مخې دفاعي مرستې ژر عملي کړي.

هغه ټینګار وکړ چې د «پېټریاټ» دفاعي سیسټمونو د جوازونو، او د اروپا د ګډ بالستیک ضد دفاعي پروژې پر چټک پرمختګ باید ژر اقدام وشي او دا مهال د اوکراین د ټولو دولتي ادارو لومړیتوب هم همدا دی.

پیونګ‌یانګ ناټو هم تورنه کړې چې د خپلو پوځي ایتلافونو د پیاوړتیا او وسلو د زیاتولو له لارې نړیوال کړکېچ لا پسې ژوروي.

د رویټرز د راپور له مخې، د شمالي کوریا د بهرنیو چارو وزارت په هغه اعلامیه کې، چې د دولتي خبري اژانس KCNA خپره کړې، ویلي چې متحده ایالات او متحدان یې د ناټو له وروستۍ سرمشریزې وروسته د پوځي ایتلافونو د پراختیا او د وسلو د سیالۍ د چټکتیا هڅه کوي.

اعلامیه زیاتوي چې د ناټو مشرانو د شمالي کوریا د «خپلواکو او مشروع حاکمیتي حقونو» کارول د ګواښ په توګه انځور کړي دي.

د شمالي کوریا د بهرنیو چارو وزارت ویلي، ناټو د دفاعي لګښتونو په زیاتولو او د اسیا ـ ارام سمندر سیمې له خپلو متحدانو سره د پوځي همکاریو په پراخولو، د ائتلافونو ترمنځ د تقابل پر سیاست لا ټینګار کړی دی.

پیونګ‌یانګ ټینګار کړی چې که نړیواله ټولنه د اټومي بې‌وسلې کېدو رښتینې اراده لري، نو دا بهیر باید له امریکا او د هغې له متحدانو څخه پیل شي، نه له شمالي کوریا.

سرفراز بګټي د جمعې په ورځ (د چنګاښ ۱۹مه) په خپله اېکس‌پاڼه لیکلي، چې د «شعبان» په نوم په ګډو ځمکنیو او هوايي عملیاتو کې ۳۹ وسله‌وال او د جولای له پنځمې تر اوسه په ټولیزه توګه ۷۵ وسله‌وال وژل شوي دي.

نوموړي دغه راز زیاته کړې، چې په کچهر سیمه کې پر زېري پولیس سټیشن د وسله‌والو یو برید هم ناکام کړای شوی دی.

بل لور ته د پاکستان لومړي وزیر شهباز شریف د پوځ له مشر عاصم منیر سره په کوېټه کې د ملي عمل پلان د ایالتي اپېکس کمېټې په غونډه کې وویل، چې د هېواد ملکي او پوځي مشرتابه په ګډه او یو غږ پرېکړه کړې، چې په بلوچستان کې به «ترهګري» په بشپړه توګه له منځه یوسي.

د پاکستان د پوځ د عامه اړیکو دفتر مشر احمد شریف چودري بیا په راولپنډۍ کې یوې خبري غونډې ته وویل، چې د جولای له پنځمې راهیسې په بلوچستان کې د وسله‌والو په بریدونو او تر هغې وروسته عملیاتو کې لږ تر لږه ۴۲ کسان وژل شوي، چې ډېری یې امنیتي سرتېري دي. نوموړي ادعا وکړه، چې د دغو بریدونو تر شا د هند او په افغانستان کې د مېشتو ځواکونو لاس دی چې په وینا یې، د پاکستان ثبات نه‌شي زغملی.

په بلوچستان کې په دې وروستیو کې د بریدونو نوې څپه پیل شوې، چې له امله یې د پاکستان لسګونه سرتېري او پولیس وژل شوي دي.

بل خوا د طالبانو ویاند ذبیح الله مجاهد د پاکستان د لومړي وزیر شهباز شریف هغه ادعاګانې په کلکه رد کړې دي، چې ګواکې د افغانستان له خاورې څخه په خیبر پښتونخوا او بلوچستان کې بریدونه تنظیمېږي.