رویټرز ته یوې سرچینې ویلي، چې جرمني د اوکراین لپاره د ۵۰ زره بریدګرو ډرونونو د پېرلو لګښت ور کوي. د راپور له مخې، د دغه قرارداد ارزښت شاوخوا ۹۰ میلیونه یورو دی او د اوکراین د سکای فال شرکت جوړ شرایک ډرونونه پکې شامل دي.
د رویټرز د راپور له مخې، دغه بریدګر ډرونونه د امریکا د «اوټیریون» شرکت په داسې سافټویر سمبال دي چې د الوتنې په وروستي پړاو کې خوځنده هدفونه په خپلواکه توګه تعقیبوي او پرې برید کوي.
د اوټیریون اجراییه رییس لورېنز مایر د قرارداد کچه تایید کړې او ویلي یې دي چې ارزښت یې شاوخوا ۹۰ میلیونه یورو دی. د هغه په وینا، د ډرونونو یوه برخه لا اوکراین ته سپارل شوې او پاتې به یې د روان کال تر پایه ولېږدول شي.
د «سکایفال» شرکت د جرمني ګډون تایید کړی، خو د قرارداد د جزییاتو له څرګندولو یې ډډه کړې ده. د جرمني او اوکراین دفاع وزارتونو هم په دې اړه له تبصرې کولو ډډه کړې ده.
بریتانیا هم تېره میاشت اعلان کړی و چې د ۷۵۲ میلیونه پونډو د مرستو د کڅوړې په چوکاټ کې به سږ کال اوکراین ته ۱۵۰ زره ډرونونه ورکړي.
