انتونیو ګوترېش: تهران او واشنګټن دې خپل پاتې اختلافونه د ډیپلوماسۍ له لارې حل کړي
د ملګرو ملتونو سرمنشي انتونیو ګوټرېش د فارس خلیج په سیمه کې د کړکېچ د زیاتېدو او د پوځي نښتو د بیا پیل په اړه ژوره اندېښنه څرګنده کړې او له ایران او امریکا یې غوښتي چې ژر تر ژره خبرو ته بېرته راستانه شي.
ګوټرېش د یکشنبې په ورځ، د چنګاښ په ۲۱مه، پر ایکس خواله رسنۍ کې لیکلي چې په هرمز تنګي کې پر بېړیو د ایران بریدونه، د ایران پر ضد د امریکا پوځي بریدونه او د تهران له لوري په ګاونډیو هېوادونو کې پر هدفونو ترسره کېدونکي بریدونه باید ودرول شي.
د ملګرو ملتونو سرمنشي ټینګار کړی چې د سیمې روان تاوتریخوالی د لا پراخې بېثباتۍ لامل کېدای شي او ټول ښکېل لوري باید له پوځي اقداماتو ډډه وکړي.
ګوټرېش ویلي: «له ایران او امریکا غواړم چې بېړنۍ خبرې اترې بېرته پیل کړي او پاتې اختلافونه د ډیپلوماسۍ او خبرو اترو له لارې حل کړي.»
د هغه په وینا، ډیپلوماسي او سیاسي خبرې د روان کړکېچ د پای ته رسولو او د سیمې د ثبات د ټینګښت تر ټولو اغېزمنه لار ده.
