زيلېنسکي د اوکراین د لومړۍ وزیرې د بدلولو وړاندیز کړی
د اوکراین ولسمشر ولادیمیر زېلېنسکي اعلان وکړ چې د دغه هېواد د لومړۍ وزیرې یولیا سوېریډینکو د بدلولو وړاندیز یې کړی دی. نوموړي وویل چې دا پرېکړه په حکومت کې د نوې سیاسي تګلارې د پلي کولو لپاره شوې ده.
د اوکراین ولسمشر ولادیمیر زېلېنسکي د یکشنبې په ورځ د خپلې لومړۍ وزیرې د راتلونکې دندې یا د هغې د ځایناستي په اړه نور جزییات ورنهکړل، خو زیاته یې کړه چې د قانون پلي کوونکو ادارو په مشرتابه کې به هم بدلونونه راشي.
د اوکراین د اپوزیسیون یوه استازي یاروسلاف ژلیزنیاک پر ټیلیګرام لیکلي چې اټکل کېږي یولیا سوېریډینکو په واشنګټن کې د اوکراین د نوې سفیرې په توګه وټاکل شي.
د هغه په وینا، د لومړۍ وزیرې په لرې کېدو سره به په کابینه کې پراخ بدلونونه راشي، ځکه د اوکراین د قوانینو له مخې د لومړي وزیر استعفا د ټول حکومت د مستعفي کېدو په مانا ده او دا چاره د پارلمان تایید ته اړتیا لري.
یولیا سوېریډینکو د ۲۰۲۵ کال په جولای میاشت کې د اوکراین د لومړۍ وزیرې په توګه ټاکل شوې وه.
د اوکراین د پارلمان غړي وایي چې د هغې د احتمالي ځایناستو په توګه د انرژۍ وزیر دینیس شمیهال، د دفاع وزیر میخایلو فیدوروف او د نفتو او ګازو د دولتي شرکت مشر سرهي کورتسکي نومونه تر بحث لاندې دي.
