ایرانی چارواکی: د امریکا د بریدونو د احتمالي زیانونو ارزونه په اتو ښارونو کې روانه ده
د ایران د خوزستان ولایت د والي امنیتي او انتظامي مرستیال وليالله حیاتي، ویلي چې د دوشنبې سهار وختي د امریکا د بریدونو پر مهال د دغه ولایت په اتو ښارونو کې یو شمېر سیمې په نښه شوې او د احتمالي زیانونو ارزونه لا هم دوام لري.
حیاتي د ایران دولتي خبري اژانس (ایرنا) ته ویلي، چې د اهواز، امیدیه، ماهشهر، بهبهان، دزفول، اندیمشک، آبادان او د شادګان شاوخوا سیمې د امریکايي توغندیو هدف ګرځېدلې دي.
هغه زیاته کړې، په اهواز کې د ښار له محدوده بهر دوه ځایونه لګېدلي او هغه راپورونه یې رد کړي چې ګواکې د اهواز هوايي ډګر په نښه شوی دی.
د نوموړي په وینا، په اندیمشک کې یو ځای، په بهبهان او دزفول کې څو سیمې، په امیدیه او ماهشهر کې څلور ځایونه او همدارنګه په آبادان او د شادګان په شاوخوا کې یو شمېر نورې سیمې هم د بریدونو هدف ګرځېدلې دي.
د خوزستان د والي امنیتي مرستیال ویلي، اړوندې ادارې د احتمالي زیانونو د ارزونې او د زیانمنو سیمو د څېړنې په حال کې دي او د لومړنیو ارزونو له بشپړېدو وروسته به نور جزییات هم له رسنیو سره شریک شي.
