په بامیان کې د طالبانو تر کنټرول لاندې د بدني روزنې او ورزش امریت اعلان کړی، چې د دغه ولایت دوه غرختونکي مرتضی نجفي او سید محمد طاهري د شاه فولادي د ۵۱۴۰ مترو لوړې څوکې ته په بریالیتوب سره ورسېدل. دغه دواړه ورزشکاران له راستنېدو وروسته د ورزشي مسوولینو لهخوا وستایل شول.
د راپور له مخې؛ دغه دواړو لوبغاړو د چنګاښ میاشتې په ۱۹مه او ۲۰مه د دوه ورځني پروګرام په جریان کې د شاه فولادي تر ټولو لوړې څوکې ته وختل. دواړه وزرشکاران د مسوولینو لهخوا وستایل شول او وهڅول شول.
سید محمد طاهري د افغانستان د سکي ملي لوبډلې او مرتضی نجفي د افغانستان د غرختنې د ملي لوبډلې غړی دی. په بامیان کې د طالبانو تر کنټرول لاندې د بدني روزنې او ورزش امریت ویلي، چې د دغه غر ختنې موخه د غرختنې کلتور دودول، په طبیعت کې ورزشي فعالیتونو ته د ځوانانو هڅول او د شاه فولادي څوکه د افغانستان د غرختنې له مهمو وړتیاوو او جاذبو معرفي کول دي.
