لوېدیځو مشرانو له اوکراین سره د توغندیو ضد دفاعي ایتلاف پر جوړولو هوکړه وکړه
د فرانسې ولسمشرۍ ماڼۍ په یوه اعلامیه کې ویلي، چې د ډنمارک، فرانسې، جرمني، اېټالیا، هالنډ، ناروې، اسپانیا، سویډن او بریتانیا مشرانو له اوکراین سره د بالستیک توغندیو ضد د یوه ګډ ایتلاف پر جوړولو هوکړه کړې ده.
په اعلامیه کې راغلي:«موږ په دې باور یو چې د اروپا خوندیتوب د توغندیزې دفاع د یوه داسې هراړخیز او مدغم جوړښت رامنځته کولو ته اړتیا لري، چې وکولای شي د راتلونکو توغندیزو ګواښونو مخه ونیسي او ماتې ورکړي. دغه هدف د ډلهییزو هڅو، تخنیکي پرانیستلو او د باور وړ صنعتي همکاریو له لارې ترلاسه کېدای شي».
د فرانسې د ولسمشرۍ ماڼۍ په وینا، دا نوی ګډ ګام به د بالستیک توغندیو پر وړاندې د شته دفاعي سیسټمونو ملاتړ او بشپړاوی وکړي؛ په هغو کې د اروپا خپلواکې حللارې هم شاملې دي چې د ګډونوالو هېوادونو لخوا مخکې ترلاسه شوي یا به په راتلونکي کې وپېرل شي.
