په ویرجینیا کې د افغان ټولنې غړو او د کرېکټ مینهوالو د افغانستان د کرېکټ ملي لوبډلې د پخواني لوبغاړي شاپور ځدراڼ د فاتحې مراسم او د هغه یاد غونډه ترسره کړه. په غونډه کې د ځدراڼ لوبیز ژوند، خاطرې، د هغه یادونه او پر شخصي ژوند خبرې وشوې.
په غونډه کې د افغانستان په کرېکټ کې د شاپور ځدراڼ هڅې، خدمت او لاسته راوړنې هم یادې شوې او هغه یې د افغانستان د کرېکټ په تاریخ کې مهم شخصیت وباله. د شاپور ځدراڼ په فاتحې او یاد غونډه کې یوشمېر مېرمنو هم برخه اخیستې وه.
ویناوالو د شاپور ځدراڼ پر شخصي ژوند هم بحث وکړ او هغه یې «زړه سواند، مهربان، هڅاند، مسوولیت منونکی او د نویو ځوانو کرېکټ لوبغاړو لپاره یوه الګو یاده کړه».
د افغانستان ترڅنګ په امریکا او اروپا کې مېشتو افغانانو هم د شاپور ځدراڼ د فاتحې مراسم ترسره کړي او د هغه پر لوبیز او شخصي ژوند یې بحثونه کړي دي.
