د مسکو د بریدونو دوام؛ روسیې د اوکراین پر بندرونو برید وکړ
د روسیې دفاع وزارت اعلان کړی، چې د دغه هېواد پوځ د دوشنبې په سهار د اوکراین د اودېسا ښار بندري تاسیسات په نښه کړي دي. دغه وزارت ویلي، په بریدونو کې لرې واټن وېشتونکې وسلې او بېپیلوته الوتکې کارول شوې دي.
په اعلامیه کې ټینګار شوی، د «چرنومورسک» سیمې بندري زېربناوې چې د پوځي تجهیزاتو، سون توکو او غوړیو د تخلیې او زېرمه کولو لپاره کارېدې؛ د دغه بریدونو موخې وې او وېشتل شوې دي.
روسي پوځي چارواکو ادعا کړې، چې د دوی ځواکونه د دښمن د هوايي او توغندیزو دفاعي سیستمونو له تېرېدو وروسته کولی شي په کییف او د اوکراین د خاورې په ټولو برخو کې هر هدف لهمنځه یوسي.
په همدې حال کې رویټرز خبري اژانس کرملېن ته له نږدې درېیو سرچینو په حواله لیکلي و، چې د روسیې ولسمشر ولادیمیر پوتین له اوکراین سره د سولې د خبرو وړاندیزونه رد کړي دي. شاوخوا دوو سرچینو ویلي، چې ښايي پوتین په راتلونکو میاشتو کې له اوکراین سره جګړه نوره هم سخته کړي.
هغه سرچینې چې نه یې غوښتل نومونه یې څرګند شي ویلي، د اوکراین وروستیو ډرون بریدونو د روسیې د تېلو پر تصفیه خونو او بندرونو د ولسمشر پوتین هوډ لا پیاوړی کړی، چې جګړې ته دوام ورکړي.
