د بنکاک په یوه کلب کې د اور لګېدنې له امله ۲۷ کسان مړه شوي
د تایلنډ په پلازمېنه بنکاک کې د یوه کلب د اور لګېدنې په پېښه کې لږ تر لږه ۲۷ کسان مړه او ۷۳ نور ټپیان شوي دي. پولیسو ویلي چې د پېښې اصلي لامل د برښنا شارټي کېدای شي خو دوی د کلب د مالک د غفلت په اړه څېړنې پیل کړې دي.
سرچینو او عیني شاهدانو رویټرز ته ویلي چې دا پېښه د یکشنبې په نیمه شپه شوې او د تایلنډ پولیسو د پېښې په اړه جدي څېړنې پیل کړې دي څو د کلب د مسوولینو احتمالي غفلت او د بېړني وتلو د لارو د بندښت موضوع وڅېړي.
د بنکاک د روغتیايي چارواکو په وینا، په دې خونړۍ پېښه کې ۷۳ کسان ټپیان شوي چې د ۲۵ هغو روغتیايي حالت نازک ښودل شوی دی.
د تایلنډ د ملي پولیسو مشر کیتیرات فانپیت رسنیو ته وویل چې د دوی لومړنۍ ارزونې ښيي چې د کلب د مالک غفلت د دې ناورین اصلي لامل کېدای شي او په دې اړه پلټنې روانې دي.
د تایلنډ لومړي وزیر انوتین چارنویرکول چې د پېښې له ځای څخه یې لیدنه کړې، وویل چې ډېری قربانیانو د ودانۍ شاتنۍ برخې او تشنابونو ته پناه وړې وه ځکه چې په کلب کې د بېړنيو حالاتو د لارو هېڅ کومه روښانه نښه نه وه.
