اسوشیټډ پرېس: امریکايي ځواکونو د سپاه پاسداران پوځي اهداف په نښه کړي
سوشیټډ پرېس خبري اژانس د یوه امریکايي چارواکي له قوله راپور ورکړی چې امریکایي ځواکونو په خپلو وروستیو بریدونو کې د ایران د سپاه پاسداران اړوند توغندیز سیسټمونه، د هوايي دفاع تجهیزات او پوځي بېړۍ په نښه کړې دي.
د راپور له مخې، دغه امریکايي چارواکي ویلي چې د بریدونو اصلي موخه د سپاه پاسداران هغه پوځي وړتیاوې وې چې د توغندیو، هوايي دفاع او سمندري عملیاتو لپاره کارول کېږي.
تر اوسه امریکايي چارواکو د بریدونو د ځای، د زیانونو د کچې او یا د احتمالي مرګژوبلې په اړه نور جزییات نه دي خپاره کړي.
د ایران له لوري هم د دغو بریدونو په اړه رسمي غبرګون نه دی څرګند شوی.
دا راپور داسې مهال خپرېږي چې په سیمه کې د امریکا او ایران ترمنځ پوځي او امنیتي کړکېچ لا هم دوام لري او د دواړو هېوادونو ترمنځ د تاوتریخوالي د پراخېدو په اړه اندېښنې زیاتې شوې دي.
