د شپږیزې کرېکټ لیګ په نننیو سیالیو کې سپینغر پړانګانو د بست ساتونکو لوبډلې ته د ۶ وېکټو په توپیر ماتې ورکړه. بست ساتونکو ۱۴۴ منډې هدف وټاکه او سپين غر پړانګانو لوبډلې په ۱۵م اور کې دغه هدف پوره کړ او بریا یې خپله کړه.
د یادې سیالۍ پچه سپين غر پړانګانو لوبډلې وګټله او لومړی یې د توپ اچونې او ډګر ساتنې پرېکړه وکړه. بست ساتونکو لوبډلې د خپلو ټولو لوبغاړو په سوځېدو ۱۴۴ منډې هدف وټاکه.
حضرت الله ځاځي ۴۰ او عبدالله تره خېل ۳۳ تر ټولو ډېرې منډې جوړې کړې. د سپين غر پړانګانو لوبډلې په توپ اچوونکو کې زیت الله شاهین ۳، ظاهر خان، اعجاز الحق نورزي او فهیم قاسمي دوه - دوه لوبغاړي وسوځول.
د سپين غر پړانګانو په لوبډله کې بیا عصمت عالم ۴۶، زبید اکبري ۳۲ او بهیر شاه ۳۰ منډې جوړې کړې او لوبډله یې تر بریا ورسوله. په شپږیزه لیګ کې پنځه لوبډلې یو د بل په وړاندې لوبېږي.
