د مزارشریف اوسېدونکی: په ۴۳ درجې ګرمۍ کې د برېښنا پرې کېدو له ستونزو سره مخ کړي یو
د مزار شریف یو اوسېدونکي افغانستان انټرنشنل ته ویلي، چې په ۴۳ درجې ګرمۍ کې د برېښنا پرلهپسې پرې کېدو له ګڼو ستونزو سره مخ کړي دي. د هغه په خبره؛ دغه وضعیت د ښځو، ماشومانو، سپین ږېرو او نورو لپاره د نه زغملو وړ دی.
دغه اوسېدونکي زیاته کړې، د ګرمۍ په دې موسم کې په مزارشریف کې د ورځې تر څنګ د شپې هم برېښنا پرې کېږي. هغه ویلي: «د ورځې هم دوه درې ځلې او د شپې هم څو ځلې برېښنا پرې کېږي، ګرمي زیاته شوې او خلک د برېښنا د نشتوالي پرمهال د ګرمۍ له سخت حالت سره مخ وي».
د هغه په وینا؛ په مزارشریف کې د برېښنا دغه ډول پراخ او پرلهپسې پرې کېدل بېساري دي.
تر دې وړاندې د برېښنا په اړه د طالبانو د ژمنو خلاف د کابل او یوشمېر نورو لویو ولایتونو اوسېدونکو هم افغانستان انټرنشنل پښتو ته په لېږلو پیغامونو کې د برېښنا پرچاوۍ په اړه شکایتونه کړي وو. دوی ویلي وو، د هوا له ګرمېدو سره د برېښنا پرچاوي هم ډېره شوې او ورځنی ژوند یې له ګڼو ستونزو سره مخ شوی دی.
خو د برېښنا ریاست یوه کارکوونکي د نوم نه ښودلو په شرط افغانستان انټرنشنل پښتو ته ویلي و، د برېښنا د پرچاوۍ اصلي لامل د تولیدي او وارداتي برېښنا پرتله د تقاضا زیاتوالی دی.
د هغه په وینا؛ د هوا له ګرمېدو سره خلک په کورونو او رسمي دفترونو کې د هوا یخولو لپاره برېښنایي وسایل ډېر کاروي، چې د شبکې پر ظرفیت فشار زیاتوي او له همدې امله اړ کېږي چې د وېش د ځانګړي مهالوېش له مخې برېښنا پرې کړي.
