د هرات اوسېدونکی: طالبان په استوګنیزو ښارګوټو کې د ودانیزو چارو اجازه نه ورکوي
د هرات یو اوسېدونکي افغانستان انټرنشنل ته په یوه لېږلي غږیز پیغام کې ویلي، چې له قانوني اسنادو سره، سره طالبان د هرات په استوګنیزو ښارګوټو کې د دوی پر خپلو ځمکو د ودانیزو چارو اجازه نهورکوي.
نوموړي زیاته کړې، په ډېرو ښارګوټو کې د ودانیو جوړولو چارې هم نیمایي پاتې دي او له ناروښانه وضعیت سره مخ دي. د هرات دغه اوسېدونکي د اندېښنې په څرګندولو سره وایي، طالبان د ځمکو د غصب په نوم په ډېرو ښارګوټو کې د ودانیو د جوړېدو اجازه نهورکوي.
دغه کس دا هم ویلي، ډېری خلک پر ځمکو د کورونو تر جوړېدو وروسته د هغه د پیر او پلور قانوني کاروبار کوي چې د طالبانو دغه اقدام یې اندېښنې زیاتې کړې او کارونه یې ټکني کړي دي. د هغه په خبره؛ په ښارونو او ښارګوټو کې ودانیزې چارې د ښار او ټولنې د ښکلا لامل کېږي، چې طالبان یې په لوی لاس مخه نیسي.
وړاندې د طالبانو د کابل ښاروالۍ ویاند نعمتالله بارکزي ویلي و، د ودانیو جوړولو د نوي حکم له مخې هېڅوک حق نهلري چې له درېیو پوړونو لوړه ودانۍ جوړه کړي. د هغه په وینا؛ دغه درې پوړونه به له زېرزمینۍ پرته وي.
