یوه ښوونکي افغانستان انټرنشنل پښتو ته په رالیږلي پیغام کې ویلي، چې د ټیټ معاش او د کور د لوړې کرایې له امله له سختو اقتصادي ستونزو سره مخ دی او نور له دې وضعیته «لېونی» کیږي. دغه نوی راستون شوی افغان ښوونکی وايي، چې معاش یې۷ زره افغانۍ دی خو د کور ۸ زره افغانۍ کرایه ور کوي.
دغه ښوونکي ویلي، چې میاشتنی معاش یې اووه زره افغانۍ دی، خو یوازې د کور کرایه اته زره افغانۍ ورکوي. د هغه په وینا، له خپلې کورنۍ سره تازه له مهاجرته افغانستان ته راستون شوی او د ژوند لګښتونه یې تر اوسه ډېر لوړ دي.
نوموړي په خپل پیغام کې ویلي: «زه یو ښوونکی یم، اووه زره افغانۍ معاش لرم او د کور اته زره افغانۍ کرایه ورکوم. موږ نوي مهاجر راغلي یو. نور لیوني کېږو، د کور کرایه ورکړو که اولاد ته نفقه پیدا کړو».
دغه ښوونکي له طالب چارواکو غوښتي چې د ښوونکو او نورو ټیټ معاش لرونکو کارکوونکو اقتصادي ستونزو ته جدي پاملرنه وکړي او د معاشونو او د ژوند د لګښتونو ترمنځ د موجود واټن د کمولو لپاره عملي ګامونه واخلي.
د یادونې وړ ده چې دا یوازې د یوه ښوونکي روایت دی.
