ایران کې افغان کډوال: د ښوونځيو د لوړو فیسونو له امله مې ماشومان له زدهکړو بېبرخې شوي
د ایران له اصفهان نه یو افغان کډوال افغانستان انټرنشنل ته په لېږلي غږیز پیغام کې ویلي، چې په ښوونځيو کې لوړو فیسونو یې ماشومان له زدهکړو د بېبرخې کېدو له ګواښ سره مخ کړي. هغه زیاته کړې، چې د کډوالۍ په نوم کار نهشي موندلی او ژوند یې ورځ تر بلې له کړاو سره مخ کېږي.
دغه افغان کډوال زیاته کړې، چې په ښوونځي کې د زدهکوونکو فیس خورا لوړ دی او دوی یې د ورکړې توان نهلري. دغه کډوال ویلي، چې له تېرو څلورو ورځو څخه په کور کې د خوړو لپاره هم څه نهلري.
هغه وایي، د مزدورۍ له عاید سره نهشي کولی د خپلې لور د ښوونځي لوړ فیس ورکړي او له همدې امله یې لور د زدهکړو له دوام څخه د بېبرخې کېدو له ګواښ سره مخ شوې ده. نوموړي ویلي: «کډوالو ته کار نهشته، ښوونځي لوړ فیسونه اخلي او لور مې د همدې کبله له زدهکړو بېبرخې ده. موږ له افغانستان نه راغلي یو او دلته هم له بدبختۍ سره مخ یو».
ورته مهال ایران د ۱۴۰۶ ښوونیز کال لپاره د بهرنیو وګړو په ځانګړي ډول د کډوالو ماشومانو د نوملیکنې شرایط اعلان کړي. د دغه هېواد د پوهنې وزارت یوه چارواکي محمد سلیمي ویلي، د افغانانو په ګډون کډوال زدهکوونکي باید لومړی له کفالت دفترونو یا د بهرنیو وګړو له ادارې پېژندلیک ترلاسه کړي.
