فوکس ان افریقا په نوم ویبپاڼې خپل راپور کې لیکلي چې د اقلیم بدلون، پراخه ځنګلوهل او د سېلابونو د مخنیوي د بنسټیزو پروژو نشتوالي د افغانستان په ختیځ کې وروستي سېلابونه لا مرګوني کړي دي.
راپور وايي، د موسمي سختو بارانونو له امله په نورستان، ننګرهار او لغمان ولایتونو کې ناڅاپي سېلابونو لسګونه کسان مړه او ټپیان کړي، سلګونه نور ورک دي او کورونه، پلونه، بازارونه او کرنیزې ځمکې یې ویجاړې کړې دي.
د راپور له مخې، په نورستان کې د سېلابونو له امله د پارون ښار مرکزي بازار نږدې په بشپړه توګه له منځه تللی او د اوبو رسولو شبکې هم زیانمنې شوې، چې ګڼې کورنۍ یې د څښاک له پاکو اوبو بېبرخې کړې دي.
راپور زیاتوي، افغانستان د اقلیم بدلون له اغېزو سره تر ټولو زیانمن هېوادونو کې شمېرل کېږي، خو د ځنګلونو وهل، د استنادي دېوالونو، ویالو او د اوبو د مهار د پروژو نشتوالی د دې لامل شوی چې هر ځل سخت بارانونه په لویو ناورینونو واوړي.
د راپور په وینا، د طالبانو حکومت د چاپېریال ساتنې او د طبیعي پېښو د مخنیوي لپاره اغېزمنې تګلارې نه دي عملي کړې او د بیړنیو حالاتو لپاره هم کافي چمتووالی نه لري.
راپور خبرداری ورکوي چې سېلابونو یوازې کورونه نه دي ویجاړ کړي، بلکې کرنیزې ځمکې او حاصلات یې هم له منځه وړي، چې دا به د خوړو د کمښت او لوږې خطر نور هم زیات کړي.
د ملګرو ملتونو د بشري مرستو ادارې او د خوړو نړیوال پروګرام هم مخکې د افغانستان لپاره د بشري مرستو د بودجې د کمېدو په اړه خبرداری ورکړی و. راپور وايي، د طالبانو له لوري د ښځو پر زدهکړو او کار محدودیتونو د نړیوالو پرمختیايي مرستو کچه راټیټه کړې او ډېری مرستې یوازې بیړنیو حالاتو ته ځانګړې شوې دي.
د راپور له مخې، ښځې د دغو طبیعي پېښو تر ټولو ډېر زیان ویني، ځکه د مرستو ترلاسه کولو او خوندي ځایونو ته د رسېدو پر وړاندې له ګڼو ټولنیزو او اداري خنډونو سره مخ دي او ډېری ښځینهسرپرستې کورنۍ مرستو ته په اسانۍ لاسرسی نه لري.
