د هرات اوسېدونکی: طالبانو په هرات کې د قول اردو د پخوانيو کارکوونکو کورونه غصب کړي
د هرات یوه اوسېدونکي افغانستان انټرنشنل پښتو ته ویلي، د دغه ولایت ۸مې ناحیې اړوند د پخوانۍ قول اردو په سیمه کې هغه کورنۍ چې شاوخوا ۲۵ کاله وړاندې یې په ویجاړو او شاړو ځمکو کې په خپل شخصي لګښت ساده کورونه جوړ کړي وو؛ اوس طالبان دوی له خپلو کورونو باسي او ځمکې یې غصبوي.
نوموړي ویلي، دغه کورنۍ د هرات د پخوانۍ قول اردو کارکوونکي وو او کلونه یې د هېواد د دفاع او د امنیت د ساتنې په برخه کې دنده ترسره کړې ده. هغه زیاته کړې، چې دغه کارکوونکو د خپلو کمو تنخواوو پرمټ د استوګنې لپاره کورونه جوړ کړي وو.
د هرات دغه اوسېدونکی وړاندې وایي، طالبان د دغه کورنیو یوشمېر غړي په زور له خپلو کورونو اېستلي او د هغوی کورونه او شتمنۍ یې نیولې دي. نوموړي همداراز ویلي، هغه کورنۍ چې لاهم په خپلو کورونو کې پاتې دي له ګواښونو او د خپلو اولادونو د نیولو له فشار سره مخ دي؛ څو خپل کورونه پرېږدي.
د هرات دغه اوسېدونکي طالبان تورن کړي، چې د کمزورو او بېوسه کورنیو پر وړاندې له زور کار اخلي. د هغه په وینا؛ یادې کورنۍ نه په فساد، نه په غلا او نه هم په سیاسي فعالیتونو کې ښکېلې وې، بلکې عادي دولتي کارکوونکي وو چې د خپلو کورنیو د ښه ژوند او د وطن د دفاع لپاره یې دندې ترسره کولې.
د هرات ښار دغه اوسېدونکی همداراز وایي، طالبان د دې پر ځای چې د خلکو له حقونو ساتنه وکړي له هغې سرغړونه کوي او د عدالت پرځای ظلم کوي. هغه د طالبانو د ورته کړنو پر وړاندې چوپ پاتې کېدل غندي.
