د کابل په سروبي کې د یوې کورنۍ شکایت: له دوو ورځو راهیسې په ناحقه له برېښنا بېبرخې یو
د کابل ولایت د سروبي ولسوالۍ د کڅ میرخېل سیمې یوې کورنۍ افغانستان انټرنشنل ـ پښتو ته په استولي پیغام کې ادعا کړې چې د برېښنا د ټولو بیلونو له پر وخت تادیه کولو سره سره، د دوی د کور برېښنا له تېرو دوو ورځو راهیسې په ناحقه پرې شوې ده.
شکایت کوونکي وایي، دا ستونزه په داسې مهال رامنځته شوې چې د دوبي سخته ګرمي ده او د برېښنا نشتوالی یې ورځنی ژوند له ګڼو ستونزو سره مخ کړی دی.
شکایت کوونکی وايي:« د صدیق په نوم یوه کس برېښنا پرې کړې، حال دا چې هېڅ پاتې حساب نه لرو او ټول لګښتونه مو پر خپل وخت ورکړي دي».
د شکایت له مخې، تېره شپه ناوخته د سیمې نورو ټولو کورنو ته بېرته برېښنا وصل شوه، خو یوازې د دوی کورنۍ لا هم له برېښنا بېبرخې پاتې ده. شکایت کوونکي دا چاره «بېعدالتي» بولي.
د یادې کورنۍ غړو له اړوندو طالب مسوولینو غوښتي چې ژر تر ژره یې برېښنا بېرته وصل کړي او د دې ادعا شوې پېښې په اړه جدي څېړنه ترسره کړي، څو د دوی په وینا، قانوني حق یې بېرته تامین شي.
د یادونې وړ ده چې دا یوازې د کابل د سروبي ولسوالۍ د یوې کورنۍ شکایت دی، افغانستان انټرنشنل یې په خپلواکه توګه نه تاییدوي.
