رییس احمدزی: ماشومان د خیرات نه بلکې د زده کړو، فرصت او روښانه راتلونکي حق لري
د افغانستان د کرېکټ ملي لوبډلې پخواني لوبغاړي او د ۱۹ کلنو څخه د کم عمره ملي لوبډلې مشر روزونکي رییس احمدزي د ننګرهار په بهسودو ولسوالۍ کې د سیند پر غاړه د خیرات غوښتونکو بېوزله ماشومانو پر سخت وضعیت او د هغوی پر راتلونکي جدي اندېښنه ښودلې ده.
نوموړي پر ایکس خواله رسنۍ کې لیکلي: «د دغو معصومو ماشومانو د ژوند سخت حالت د هر انسان زړه دردوي».
ښاغلي احمدزي د ننګرهار د بهسودو د سیند پر غاړه د ماشومانو د وضعیت په اړه لیکلي، کله چې انسان دغه ځای ته مازیګر ورشي، واړه ماشومان په شعرونو د خلکو هرکلی کوي. هغه زیاته کړې: «د دغو ماشومانو معصوم غږونه او د هغوی د ژوند ناوړه شرایط د هر لیدونکي زړه خفه کوي».
د کرېکټ دغه پخواني ستوري پوښتنه مطرح کړې ده چې که نن د دغو بېوزلو ماشومانو لاسنیوی ونه شي، نو په راتلونکي کې به د هغوی برخلیک څه وي. هغه په خپل دغه پیغام کې ټینګار کړی چې دا ماشومان د خیرات غوښتلو نه، بلکې د زده کړو، ښو فرصتونو او د یوې روښانه راتلونکې حق لري.
رییس احمدزي د ټولنې پر غړو او اړوندو بنسټونو غږ کړی چې د دغو بېوزلو ماشومانو لاسنیوی وکړي او هغوی ته د زده کړو زمینه برابره کړي. د هغه په وینا، ماشومانو ته د زده کړې د فرصتونو برابرول د هغوی د ژوند د ښه کېدو او د ټولنې د روښانه راتلونکي یوازینۍ لاره ده.
د طالبانو په واکمن کېدو سره په هېواد کې لوږه او بشري ناورین خپل اوج ته رسېدلی چې له امله یې ان کورنیو خپل ماشومان هم پلورلي دي.
