ترکیې ته پر قاچاقي لارو تللي افغانان: ترکي پوله ساتو ځواکونو سخت وهلي یو
یوشمېر افغان ځوانان چې پر قاچاقي لارو یې ترکیې ته د تګ هڅه کوله وایي، د ترکي پوله ساتو ځواکونو له لوري سخت وهل شوي او د بدن پر بېلابېلو برخو یې ژور ټپونه جوړ شوي دي. د دوی په خبره؛ ترکي پوله ساتو ځواکونو په لرګیو، اوسپنیزو میلو او نورو وسایلو وهلي دي.
دغه افغانانو افغانستان انټرنشنل ته په لېږلې ویډیو کې ویلي: «شاوخوا ۲۰ کسان وو، چې ترکیې ته د تګ پرمهال د دغه هېواد د پوله ساتو ځواکونو له سخت تاوتریخوالي سره مخ شو». یادو افغانانو په دغه ویډيو کې د خپلو ټپونو نښې ښودلې او زیاته کړې یې ده: « که د بېوزلۍ، بېکارۍ او د هېواد د خرابه شرایطو له امله اړ نه وای؛ نو هېڅکله به مو خپل هېواد نه پرېښوده او د قاچاقي او خطرناکو لارو سفر ته به مو مخه نه کوله».
دوی له نړۍوالو سازمانونو غوښتي، چې د دوی وضعیت ته رسېدنه وکړي. د افغانستان انټرنشنل هغه څېړنیز راپور چې د ۱۴۰۴کال په غويي میاشت کې خپور شوی ښيي، چې افغان کډوال د ایران او ترکیې پر پوله له شکنجې، برمته کېدو او مرګوني تاوتریخوالي سره مخ دي.
په همدې حال کې د ترکیې د بهرنیو چارو وزارت له افغان کډوالو سره د ناوړه چلند راپورونه «بېبنسټه» بللي او ویلي یې دي، چې دغه راپورونه د ناقانونه کډوالۍ پر وړاندې د ترکیې پر بریالیو هڅو په ناعادلانه ډول سیوری غوړوي.
خو د بشري حقونو څار سازمان د طالبانو له بیا واکمنېدو وروسته په یوه راپور کې ویلي و، ترکي چارواکي هغه افغان کډوال چې له ایران نه ترکیې ته ننوځي د هغوی د پناه غوښتنې د وضعیت له ارزولو پرته په چټکۍ بېرته ایران ته ستنوي چې دا چاره د نړۍوالو قوانینو خلاف ده.
د بشري حقونو څار سازمان د کړکېچونو او شخړو مشرې څېړونکې بلقیس ویله ویلي: «ترکي چارواکي د هغه افغانانو حق تر پښو لاندې کوي، چې غواړي له ګواښه وتښتي او خوندي ځای ته ورسېږي او د پناه غوښتنه وکړي. همدارنګه ترکي سرتېري د هغوی د ناقانونه بېرته ستنولو پرمهال له افغانانو سره ډېر تاوتریخجن چلند کوي».
