په پېښور کې یوه کډواله کورنۍ چې افغانستان ته یې کډه بار کړې او غواړي هېواد ته ستانه شي، د ډیوې په نوم یوې ۱۲ کلنې نجلۍ له خپل پلاره پوښتلي چې «افغانستان کې خو ښوونځي تړلي دي، نو دا به څه کوي». پلار یې افغانستان انټرنشنل – پښتو ته استولي پېغام کې ویلي چې لور ته بې ځوابه دی.
دغه کس چې نه یو غوښتل هویت یې په ډاګه شي، له خپلې کورنۍ سره تورخم ته روان شوی او له هغې ځایه به بیا کابل کې یوه کرایه کور ته ځي. لور یې ډیوه په پاکستان کې زېږېدلې او هلته یې ښوونځی لوست، خو د پاکستان پولیسو نوره اجازه نه ورکوله چې دغه هېواد کې پاتې شي.
د ډیوې پلار افغانستان انټرنشنل – پښتو ته په راستولي پېغام کې زیاتوي: «زه هم ټېنشن کې یم چې زما د لور به څه کېږي، سکول یې په ډېر په شوق ویلو او ما به ورته چې غټه ډاکټره به درنه جوړه شي». په تېر څه باندې یو کال کې نږدې ۲میلیونه افغان کډوال افغانستان ته ستانه شوي چې د ډیوې په څېر ډېرې نجونې د طالبانو د بندیزونو له کبله په خپل هېواد کې د ښوونځیو او پوهنتونونو له زده کړو بې برخې شوې دي.
د دغو بېرته ستنېدونکو کورنیو نجونې او ښځې په افغانستان کې د طالبانو د سختو بندیزونو او محدودیتونو برخه ګرځېدلي دي. د ملګرو ملتونو سازمان هم اندېښنه ښوولې چې د بېرته ستنېدونکو کورنیو ښځینه او نجونې له کار، زده کړو او د ژوند له امکاناتو څخه محرومې شوې دي.
