د طالبانو پوهنې وزارت وايي، چې نن (شنبه- زمري ۱۰مه) د سړو سیمو ښوونځیو د اوړي رخصتۍ پایته ورسېدې او سبا به (یکشنبه- زمري ۱۱مه) ښوونیز کال بیا پیل شي. د ښوونیز کال دوام په داسې مهال دی، چې لا هم د تېرو پنځو کلونو په څېر نجونې زدهکوونکې له شپږم ټولګي پورته د زدهکړو اجازه نهلري.
خبرپاڼه زیاتوي، چې سبا به په ټولو دولتي او خصوصي ښوونځیو کې درسي بهیر په عادي ډول پیل شي. همدا راز ویل شوي، چې دیني مدرسو کې به هم سبا رخصتۍ پای ته ورسېږي او درسونه به یې پیل شي.
خبرپاڼه کې راغلي: «پوهنې وزارت، له ټولو ښوونیزو ادارو، مسوولینو، استادانو، ښوونکو، زدهکوونکو او والدینو څخه په درناوي غوښتنه کوي، چې د ښوونیز کال د چارو د منظم پیل او اغېزناک دوام لپاره لازم چمتووالی ونیسي، د ښوونیز بهیر نظم، انضباط او کیفیت ته ځانګړی پام وکړي او د زدهکوونکو د زدهکړې لاپرمختګ لپاره خپلې هڅې زیاتې کړي».
هممهاله نیوکې دي، چې د طالبانو په تېره پنځه کلنه واکمنۍ کې د افغانستان درسي نظام هم له سختو ننګونو سره مخ دی او د درسي کیفیت کچه هم خورا ټیټه شوې ده.
خلک نیوکې کوي، چې د طالبانو د بندیزونو له کبله ښوونځیو ته د تګ لېوالتیا پیکه شوې ده. طالبانو په ښوونځیو کې خپل ځانګړي شرایط پلي کړي او د هېواد په بېلابېلو سیمو کې باید زده کوونکي ښوونځي ته له لونګۍ او ځانګړو جامو سره ننوځي.
همدا راز طالبانو د مخکېني جمهوري نظام پر مهال پر دندو مقرر یو شمېر ښوونکي هم ګوښه کړي او پر ځای یې د خپلې ډلې فکري ملایان ګومارلي دي. اندېښنې دا دي، چې طالبانو د افغانستان د ښوونخیو درسي چاپیریال هم مدرسو ته ورته کړی او ډېری ملایان ان د مسلکي مضمونونو استادان ګومارل شوي چې پر کتابونو حاکمیت او پوهه نهلري.
طالبانو په تېرو پنځو کلونو کې نجونې له ثانوي او لوړو زده کړو محرومې کړي او هېڅ نجلۍ د ښوونځي له دولسم ټولګي او پوهنتون څخه نهده فارغه شوې.
ملګرو ملتونو اندېښنه ښودلې، چې د افغانستان دغه روان وضعیت به په راتلونکي کې ټولنه له سخت ناورین سره مخ کړي او د مسلکي کدرونو له جدي کمښت سره به مخ شي.
