د سپاهیان میهن جبهې په بدخشان کې د یفتل ولسوالۍ پر اعتراض کوونکو د طالبانو پر ډزو سختې نیوکې کړي او دا یې «غیرانساني» عمل بللی دی. دغې جبهې خبرداری ورکړی، چې د افغانستان د خلکو پر وړاندې د طالبانو تاوتریخوالی به بېځوابه پاتې نهشي.
دې جبهې همدارنګه د بشري حقونو له نړیوالو بنسټونو غوښتي، چې دا پېښه په خپلواکه توګه وڅېړي.
د سپاهیان میهن جبهې د شنبې په ورځ (د زمري ۱۰مه) د یوې خبرپاڼې په خپرولو سره ویلي، چې له اعتراض کوونکو سره د طالبانو تاوتریخجن چلند «د ټولنې له ټولو ارزښتونو سره په ټکر کې» دی.
اعتراضونه هغه مهال پیل شول چې د سیمې د اوسېدونکو په وینا، طالبانو د یوې ځايي ښځې بدني پلټنه وکړه. دې کار د یفتل پایین ولسوالۍ د یو شمېر اوسېدونکو جدي غبرګون او اعتراضونه راوپارول، خو طالبانو دغه اعتراضونه په کلکه وځپل.
د راپورونو له مخې، د طالبانو د ډزو له امله لږ تر لږه یو اعتراض کوونکی وژل شوی او یو شمېر نور ټپیان شوي دي.
د سپاهیان میهن جبهې په خپله خبرپاڼه کې ټینګار کړی، چې د ښځو بدني پلټنه، د خلکو د کورونو تلاشي او له خلکو سره ناسم چلند، د انساني کرامت او د خلکو له بنسټیزو حقونو ښکاره سرغړونه ده.
د طالبانو پر ضد دې نوي جوړې شوې جبهې خبرداری ورکړی، چې دا ډول کړنې به «بېځوابه پرې نهږدي».
په خبرپاڼه کې د بدخشان د وروستۍ نښتې له قربانیانو او د هغوی له کورنیو سره خواخوږي هم څرګنده شوې ده.
د سپاهیان میهن جبهه د طالبانو پر ضد له نویو جوړو شویو وسلهوالو ډلو څخه ده. دغې جبهې تر دې وړاندې په یوه ناڅاپي برید کې د څو ساعتونو لپاره د یفتل پایین ولسوالۍ تر خپل کنټرول لاندې راوستې وه او د طالبانو یو شمېر وسلهوال یې هم بېوسلې کړي وو.
