د لغمان ولایت لپاره د طالبانو د صنعت او سوداګرۍ ریاست وايي، په دغه ولایت کې د ۱۶۲ میلیونه افغانیو په لګښټ د وریجو د پروسس او بستهبندۍ د یوې کارخونې د جوړېدو چارې پیل شوې. دغه کارخونه د قرغیو ولسوالۍ په چهار باغ سیمه کې جوړېږي.
د لغمان ولایت لپاره د طالبانو د صنعت او سوداګرۍ رييس سلامت خان بلال د یکشنبې په ورځ (د زمري ۱۱مه) وویل، د دغې کارخونې د جوړېدو چارې به تر راتلونکو دوو میاشتو بشپړې شي.
د سلامت خان په وینا، په دغې کارخونه کې به په مستقیم ډول شاوخوا سلو کسانو ته د کار زمینه برابره شي او همداراز له ۴۰۰ تر ۶۰۰ نور کسان به په غیرې مستقیم ډول ورسره په کار بوخت شي.
له دې سره سم، د یادې کارخونې څښتن حاجي سلیم وايي، دغه کارخونه به په ۲۴ ساعتونو کې ۴۰ زره کیلو ګرامه وریجې پروسس کړي او په وینا یې، له لغمان سربیره به د ننګرهار، بغلان او کندوز ولایتونو د وریجو پروسس چارې هم په همدې کارخونه کې ترسره شي.
هغه زیاتوي، پروسس شوې او بسته بندي شوې وریجې به بیرته ننګرهار، کونړ، نورستان، کابل، پکتیا او خوست ولایتونو ته ولېږدول شي.
د دغې کارخونې د جوړېدو چارې په داسې حال کې دي، چې په افغانستان کې صنعتګر د کارخونو د جوړولو لپاره د مناسب ځای او ځمکو له نشتوالي او همداراز د برېښنا له کمښته شکایت لري او د صنعتګرو په وینا، طالبانو په تېرو پنځو کلونو کې د کارخونو د جوړولو لپاره د ځمکو او همداراز د برېښنا برابرولو په برخو کې یوازې ژمنې کړي او د عمل په میدان کې هېڅ هم نهلیدل کېږي.
