د طالبانو د اصلاحي کمېسیون مشر محمد قاسم خالد وایي، افغانستان متخصص ډاکټران لري، خو قاچاقي او بې کیفیته درمل د ناروغانو د نه رغېدو اصلي لامل دي. د هغه په وینا، افغانستان ته د پاکستان له قاچاقي لارو واردېدونکي درمل «زهر» دي.
دغه طالب چارواکي، چې په کابل کې د سوري زړه ناروغانو د درملنې روغتون په پرانېستغونډه کې خبرې کولې، وویل، «اصلي ستونزه د متخصصو ډاکټرانو کمښت نه، بلکې د معیاري او باکیفیته درملو نشتوالی دی».
د نوموړي په وینا، هغه قاچاقي درمل چې افغانستان ته له پاکستان نه راوړل کیږي، په میاشتو میاشتو په سرحدي سیمو کې تر لمر لاندې پاتې کېږي، کیفیت یې له منځه ځي او وروسته بازار ته وړاندې کېږي.
هغه زیاته کړې چې که یو ناروغ د بې کیفیته درملو له امله له روغتیايي ستونزو سره مخ شي، یا خپل ژوند له لاسه ورکړي، مسوولیت یې د هغو سوداګرو او درمل پلورونکو پر غاړه دی چې دغه ډول درمل واردوي او پلوري.
د طالبانو د اصلاحي کمېسیون مشر ویلي، چې افغانستان د درملو په برخه کې پر ځان بسیا نه دی او اړتیا ده چې د معیاري درملو د تولید لپاره عملي اقدامات وشي.
هغه پر سوداګرو او درمل پلورونکو غږ وکړ چې د بې کیفیته درملو له واردولو او پلورلو ډډه وکړي.
د افغانستان او پاکستان ترمنځ د سیاسي کړکېچ او د سرحدي لارو له بندېدو وروسته، طالبانو د پاکستان د درملو پر وارداتو محدودیتونه لګولي او د قاچاقي درملو د مخنیوي خبره یې هم کړې ده. خو وخت ناوخت له پاکستان څخه له قاچاقي لارو د بې کیفیته درملو د نیولو او ضبط خبرونه هم خپرېږي.
