د طالبانو تر کنټرول لاندې د المپیک، بدني روزنې او سپورټ عمومي ریاست ویلي، د افغانستان د فوټسال ملي لوبډلې د کانټنینټال جام سیالیو په لومړۍ لوبه کېله کوربه ټایلنډ څخه د ۶-۱ ګولونو په توپیر ماتې وخوړه.
د یاد ریاست په وینا، د افغانستان لپاره په دې لوبه کې یوازینی ګول محمد مرادي ترسره کړ.
ټاکل شوې چې د افغانستان ملي لوبډله خپله دویمه سیالي د دوشنبې په ورځ د کابل پر وخت د ماښام په ۶بجو د ویتنام پر وړاندې ترسره کړي.
د کانټنینټال جام سیالۍ د اګسټ په لومړۍ نېټه پیل شوې او د اګسټ تر شپږمې به دوام وکړي.
په دغو سیالیو کې د کوربه ټایلنډ او افغانستان ترڅنګ د روسیې، ویتنام او نیوزیلنډ د فوټسال ملي لوبډلې هم ګډون لري.
د طالبانو د ترانسپورت او هوايي چلند وزارت د هواپوهنې ادارې ویلي، د هېواد په ۱۲ ولایتونو کې د سختو بارانونو، تالندې برېښنا، زورورو بادونو او احتمالي سېلابونو د رامنځته کېدو اټکل شوی دی.
یادې ادارې د یکشنبې په ورځ، د زمري ۱۱مه، په خپره کړې خبرپاڼه کې ویلي چې دغه وضعیت د دوشنبې لپاره د نورستان، کونړ، لغمان، پنجشېر، کاپیسا، ننګرهار، لوګر، پکتیا، خوست، پکتیکا، غزني او بدخشان ولایتونو کې اټکل شوی دی.
د خبرپاڼې له مخې، په دغو ولایتونو کې د باران کچه د سیمو له مخې د ۱۰ تر ۴۰ میلیمترو پورې اټکل شوې ده.
د هواپوهنې ادارې همداراز ویلي، په مرکزي، ختیځو، سوېل ختیځو، سوېلي، لوېدیځو او شمالي ولایتونو کې د دوړو له طوفانونو سره د تندو بادونو د لګېدو احتمال هم شته.
د خبرپاڼې له مخې، د دغو بادونو چټکتیا به په بېلابېلو سیمو کې په ساعت کې د ۵۰ څخه تر ۹۵ کیلومترو پورې وي.
چارواکو له خلکو غوښتي چې د احتمالي سېلابونو، تندو بادونو او نورو ناوړه هوايي پېښو پر مهال لازم احتیاطي تدابیر ونیسي.
په هلمند کې د طالبانو رسنیز دفتر ویلي، د دغه ولایت په فرعي ګمرکونو کې یې ۲۵۳۰۹ کیلو ګرامه خوراکي، غیر خوراکي او صادراتي قاچاقي توکي ترلاسه کړي دي. د دغه دفتر په وینا، دغه قاچاقي مواد په تېره یوه اونۍ کې ترلاسه شوي او د لېږد په تړاو یې ۲۰ کسان هم نیول شوي دي.
د هلمند د رسنیو دفتر د یکشنبې په ورځ (د زمري ۱۱) د یوې خبرپاڼې په خپرولو سره ویلي، په دغو قاچاقي توکو کې انساني، حیواني او کرنیز درمل، نشهيي مواد، رخت، شاپینګ، پرزهجات، تېزاب، رنګ، تمباکو، پلاستیک، وریجې، د مخ کریمونه، پلستران، امبار، ټایرونه او همداراز ۱۰،۵۳۲ کیلوګرامه صادراتي مس او زړه اوسپنه شامل دي.
خبرپاڼه زیاتوي، په دې لړ کې یوه ثقیله وسله، ۲ میل کارملیان، ۵۴۵ د کارملیان مرمۍ، ۳ شاجورونه، ۳ د ثقیلې وسلې شریډونه او ۸ راکټ پټاسونه هم ترلاسه او ضبط شوي دي.
د خبرپاڼې پر بنسټ، دغه ناقانونه وارداتي او صادراتي توکي په تېره یوه اونۍ کې د لښکرګاه ښار، د ګرمسېر ولسوالۍ د رېګ سیمې، د بهرامچې ولسوالۍ د رباط رېګ سیمې او د ډیورند اړوند لارو کې ترلاسه شوي او په ناقانونه توګه یې د انتقال مخه نیول شوې ده.
د خبرپاڼې لهمخې، د دغو موادو د قاچاق په تړاو ۲۰ کسان له ۱۵ موټرو سره یو ځای نیول شوي دي.
په خبرپاڼه کې د یادو توکو د مبدا یا صادروونکي هېواد د نوم په اړه څه نهدي ویل شوي، خو تر دې مخکې دغه ډول مواد د بهرامچې له لارې پاکستان او افغانستان ته انتقال کېدل.
له شاوخوا لسو میاشتو راهیسې د افغانستان او پاکستان تر منځ هر ډول سوداګري په ټپه درول شوې او اوس یو شمېر کسان هڅې کوي په قاچاقي توګه دواړو خواو ته د اړتیا وړ مواد ولېږدوي.
د یونان پولیس وايي، یو ۲۶ کلن افغان یې د یوې ۳۸ کلنې برېتانیایۍ ښځې د وژنې په تړاو نیولی دی. د پولیسو په وینا، نیول شوي کس اعتراف کړی چې د ښځې تر وژلو وروسته یې د هغې له موبایل او بانکي کارتونو هم استفاده کړې ده.
د یونان پولیسو ویلي، د ۳۸ کلنې برېتانیایۍ ښځې الیزابت جېن راس چې «لېزا» هم بلل کېده مړی د جولای په ۱۸مه د اتن ښار د کیپسیلي په سیمه کې د یوې پرېښودل شوې ودانۍ دننه په یوه بکس کې موندل شوی و.
د پولیسو د معلوماتو له مخې، نوموړې د جون په وروستیو کې یونان ته تللې وه او په څو ځایونو کې تر اوسېدو وروسته یې د اېکسارخیا په سیمه کې یو اپارتمان په کرایه نیولی و.
څېړنو ښودلې چې یو ۲۶ کلن افغان د هغې اپارتمان ته لاسرسی درلود.
پولیس وایي، د امنیتي کامرو او د موبایل د معلوماتو له ارزونې وروسته لیدل شوي چې شکمن کس د جولای د ۱۶مې په شپه یو لوی بکس له اپارتمان څخه هغې ودانۍ ته لېږدولی چې وروسته پکې د ښځې مړی وموندل شو.
پولیسو ویلي شکمن کس په لومړیو کې ادعا کړې وه چې ښځه یې په اپارتمان کې مړه موندلې او وروسته یې مړی په بکس کې ایښی و خو وروسته یې دا هم منلې چې د قرباني له موبایل څخه یې د هغې په نوم کورنۍ او ملګرو ته پیغامونه استولي او د هغې له بانکي کارتونو یې پیسې ایستلې دي.
د اګست په لومړۍ نېټه د شکمن کس په استوګنځي کې د پلټنې پر مهال یوه تقلبي ګلاک ډوله تومانچه او یوه پوځي ډوله چاړه هم موندل شوې چې له همدې امله د وسلو اړوند نور تورونه هم پرې لګېدلي دي.
پولیس وایي، د عدلي متخصصانو په مرسته د قرباني د ګوتو نښې ترلاسه شوې او د انټرپول په همکارۍ یې هویت تثبیت شوی. تورن کس عدلي ارګانونو ته سپارل شوی او د قضیې څېړنې روانې دي.
د افغانستان لپاره د ناروې کمېټې رییس تاری مګنوسن واتردال د طالبانو د اقتصاد له وزیر دین محمد حنیف سره لیدلي دي. د طالبانو د اقتصاد وزارت ویلي، چې دواړو لورو په دې لیدنه کې د بشري او پرمختیایي مرستو او د افغانستان لپاره د ناروې کمېټې د څلور کلنې تګلارې په اړه خبرې کړي دي.
د طالبانو اقتصاد وزارت نن یکشنبه، د زمري پر ۱۱مه پر خپل اېکس پاڼه لیکلي چې واتردال ټینګار کړی چې د اړیکو برخه د ناروې کمېټې د تګلارې تر ټولو مهمه برخه ده او دغه کمېټه به «هڅه وکړي چې له دې لارې نړۍوالې ټولنې ته د افغانستان واقعي او مثبت انځور وړاندې کړي.»
د افغانستان لپاره د ناروې کمېټې تر اوسه د دې لیدنې په اړه معلومات نه دي ورکړي.
طالبان چې په تېرو پنځو کلونو کې یې د افغانستان وګړي په ځانګړې توګه ښځې له خپلو بنسټیزو حقونو بېبرخې کړې او پراخ محدودیتونه یې پر لګولي، تل له رسنیو، بهرنیو چارواکو او سازمانونو غواړي چې نړۍوالې ټولنې ته د افغانستان مثبت انځور وښيي.
د طالبانو د خبرپاڼې پر بنسټ، د افغانستان لپاره د ناروې کمېټې رییس همدارنګه ویلي چې د دغه سازمان څلور کلنه تګلاره «پر درېیو اصلي محورونو لکه پر خوراکي مصونیت، د طبیعي سرچینو پر مدیریت او پر روغتیا او بیارغونې متمرکزه ده.»
د طالبانو د اقتصاد وزیر دین محمد حنیف هم د افغانستان لپاره د ناروې کمېټې له فعالیتونو مننه کړې او د دغه سازمان تګلاره یې «د افغانستان د خلکو د معیشتي وضعیت د ښه کولو په لاره کې یو اغېزمن ګام» بللی دی.
د طالبانو د اطلاعاتو او فرهنګ وزارت د خپرونو چارو معین مهاجر فراهي له رسنیو غوښټي چې د زمري ۲۴مې مراسمو ته پراخ رسنیز پوښښ ورکړي او د دې ډلې د پنځه کلنې واکمنۍ په اړه بېلابېلې خپرونې چمتو کړي.
د طالبانو د اطلاعاتو او فرهنګ وزرات د خپرونو چارو معین فراهي په کابل کې د رسنیو له استازو سره د هغږۍ ناسته کړې.
نوموړي ویلي ،د زمري ۲۴مې د نمانځلو لپاره د هېواد په کچه په بېلابېلو برخو کې پراخ چمتوالی نیول شوی او له رسنیو یې غوښتي چې د دغې ورځې مراسمو پراخ پوښښ ورکړي.
فراهي زیاته کړې:« رسنۍ باید د زمري ۲۴مې د نمانځلو پر مهال د تېرو پنځو کلونو لاسته راوړنو او د تېر شل کلن اشغال په اړه بېلابېلې خپرونې جوړې کړي، څو هېوادوال او نړیوال د یادو موضوعاتو په اړه معلومات ترلاسه کړي تر څو راتلونکې ځوان نسل ته د تیر ظلمونو په اړه معلومات وشي».
همدارنګه فراهی زیاته کړې چې رسنۍ دې د پاکستان د پوځ «ناوړه عملونه» هم په ښه توګه رسنیز کړي.
په یاده خبرې ناسته کې د طالبانو مرستیال ویاند حمدالله فطرت د طالبانو حکومت د اطلاعاتو او رسنیو مرکز رییس مولوي نعیم الحق حقاني او د ورزش او بدني روزنې عمومي رییس احمدالله وثیق هم د رسنیو مسولینو او خبریالانو ته سپارښتنې کړې دي.
دوی ویلي،د نظام او عامه افکارو ساتنه د ټولو ګډ مسولیت دی او رسنۍ دې د یادې ډلې د پرمختګونو او مهمو موضوعاتو په اړه بېلابېلې خپرونې جوړې او خپرې کړي.
د زمري ۲۴مه د طالبانو له لوري د یادې ډلې د بیا واکمنېدو د کلیزې په توګه نمانځل کېږي. طالبان وایي، له دې وروسته یې په هېواد کې امنیت او د بیارغونې چارې پیاوړې کړې دي، خو د دې ورځې په اړه د افغانستان دننه او بهر بېلابېل نظرونه شتون لري.