د اسلاماباد سترې محکمې د پاکستان د تحریک انصاف ګوند بنسټګر او پخواني لومړي وزیر عمران خان او د هغه د مېرمنې بشرا بيبي د انفرادي بندخونو په اړه د شکایتونو او راپورونو تر اورېدو وروسته خپله پرېکړه وځنډوله.
محکمې دواړه خواوو ته ویلي، د محکمو د هغه پرېکړو پر وړاندې چې اعتراض لري؛ په لیکلې بڼه دې محکمې ته وسپاري. د حکومت وکیل محکمې ته وویل، چې عمران خان او بشرا بيبي په انفرادي بندخونه کې نهدي ساتل شوي؛ بلکې د امنیتي دلایلو له امله له نورو بندیانو جلا ځای پر ځای شوي دي.
د هغه په وینا؛ عمران خان ته ورځپاڼې، کتابونه او نورې اسانتیاوې هم ورکول کېږي. د اډیاله زندان مشر وایي، چې عمران خان ته تراوسه تر ۵۰۰ ډېر کتابونه ورکړل شوي او هغه د ورځې لهخوا له خپلې خونې بهر څو ځلې د تګراتګ اجازه لري. نوموړي زیاته کړه، چې د قانون له مخې یوازې هغه بندخونې انفرادي ګڼل کېږي چې زنداني پهکې ټوله ورځ په یوه کوټه کې بند وي.
بل لور ته د عمران خان وکیل سلمان صفدر ویلي، چې د هغه موکل له اوږدې مودې راهیسې له سختو محدودیتونو سره مخ دی. د هغه په خبره؛ عمران خان د سترګو ناروغۍ، د کورنۍ او وکیلانو سره د محدودو لیدنو او د قانوني سلا مشورو له نه شتوالي شکایت کړی دی.
وکیل له محکمې غوښتي، چې د زندان د وضعیت ارزونې لپاره یوه خپلواکه کمېټه وټاکي، عمران خان ته له خپلو دوو زامنو سره په اوونۍ کې یو ځل د ټېلیفون له لارې د خبرو اجازه ورکړي او له کورنۍ او وکیلانو سره یې منظمې لیدنې یقیني کړي.
دارنګه د عمران خان خور علیمه خان هم محکمې ته ویلي، چې له تېرې ډسمبر میاشتې راهیسې ورور ته یې یوازې درې کتابونه ورکړل شوي او له کورنۍ سره یې لیدنې هم ډېرې محدودې شوې دي.
د اډیاله زندان د راپور له مخې؛ بشرا بيبي هم په انفرادي بندخونه کې نهده ساتل شوې، بلکې د امنیتي لاملونو له امله ورته جلا استوګنځی برابر شوی او د زندان د اصولو له مخې هره سېشنبه له عمران خان سره د لیدنې اجازه لري.
د ټولو لاملونو له اورېدو وروسته د اسلاماباد سترې محکمې خپله پرېکړه خوندي کړه. بل لور ته د پاکستان تحریک انصاف ګوند د زندان د ادارې راپور رد کړی او ویلي یې دي، چې عمران خان لاهم له محدودیتونو سره مخ دی.
دغه ګوند غوښتنه کړې، چې د محکمې ټول حکمونه عملي شي له کورنۍ او وکیلانو سره یې لیدنې بې خنډه ترسره شي او د هغه روغتیایي معاینه د شخصي ډاکټرانو لهخوا ترسره شي.
